“Qərənfil - şəhid qanı...”.

Şair ürəyindən qopan bu misralar elə bil o qanlı gecənin boyuna biçilmişdi. Yollar, səkilər, şəhid qanı axan bütün küçə və prospektlər qırmızı qərənfillərə bürünmüşdü. Azərbaycan paytaxtı özünün ilk azadlıq mücahidlərinə, müstəqillik yolunun ilk şəhidlərinə, qan dənizində üzən azadlıq şəhərinə qərənfillərlə yas saxlayırdı...

O gündən, o gecədən qərənfil matəm çiçəyi, yas məclislərinin yaraşığı oldu.

Yanvarın 22-də Dağüstü parkda keçirilən möhtəşəm və izdihamlı matəm mərasimində də tabutların, şəhid məzarlarının üstü başdan-başa qırmızı qərənfillərlə dolu idi. Bakının ən hündür nöqtəsi - onların uyuduğu torpaq müqəddəs Şəhidlər xiyabanına, xalqımızın ən müqəddəs ziyarətgahına, and yerinə çevrildi. İndi sevənlər, ailə həyatı quranlar, fotosessiya edənlər də bu müqəddəs məkana üz tuturlar.

Bu gün 20 Yanvar şəhidlərinin növbəti ildönümü günü xiyaban yenə də qərənfil yağışına qərq olub. Hər kəs əlində, qucağında, yaxasında qırmızı qərənfil müqəddəs dərgahda öz canını xalqımızın müstəqilliyi, suverenliyi, ərazi bütövlüyü uğrunda qurban verənlərin son mənzilinə tələsir.

Hər şəhidə bir düzüm,
Abşeron - qan dənizim.
Sən - mənim ağlar gözüm,
Ağla, qərənfil, ağla!

Bu gün xiyabanı qırmızı rəngə boyayan qərənfillər təkcə hüzn, faciə və kədər ifadə etmir, hamının dərdinə şərik olmaqla yanaşı, həm də birlik, həmrəylik, müqəddəs amallar uğrunda mübarizəni ifadə edir. Məhz həmin birlik, həmrəylik və mübarizə ilə şəhid arzuları çiçək açıb, Azərbaycan o vaxt qanlı şənbə gecəsinin günahsız qurbanlarının xəyallarına gəlməyəcək dərəcədə böyük xoşbəxtliyə qovuşub: müstəqildir, başı üstündə üçrəngli bayraq dalğalanır, ərazi bütövlüyünə və suverenliyə nail olub, qalib ölkədir. Bu yolun başlanğıcı isə küçələri şəhid qanına, şəhid qanının isə qırmızı qərənfillərə büründüyü qanlı gecədən başlayır...