İlham Heydər oğlu Əliyevin Azərbaycan Prezidenti seçilməsinin 20-ci ildönümü ilə əlaqədar oktyabrın 13-də Azərbaycan Həmkarlar İttifaqları Konfederasiyasında (AHİK) tədbir keçirilib.

AZƏRTAC xəbər verir ki, tədbirdə AHİK-in rəhbərliyi və kollektivi, həmçinin üzv təşkilatların sədrləri və əməkdaşları iştirak ediblər.

Tədbirdə çıxış edən AHİK-in sədri, Milli Məclisin deputatı Səttar Möhbalıyev dövlətimizin başçısı İlham Əliyevin uğurlu demokratik siyasi fəaliyyətindən, son 20 ildə Azərbaycanın dinamik və davamlı inkişaf tarixindən, xalqın xoşbəxt və firavan həyatını təmin edən bütün istiqamətlərdə, o cümlədən sosial-iqtisadi sahədə həyata keçirilmiş islahatlardan danışıb.

AHİK sədri diqqətə çatdırıb ki, indiyədək ölkəmizdə regionların inkişafı ilə bağlı qəbul edilən 4 Dövlət Proqramı nəticəsində bölgələrin siması xeyli dəyişib, əhalinin məşğulluğu üçün minlərlə yeni iş yeri açılıb.

O, əminliklə qeyd edib ki, həmkarlar ittifaqlarının nümayəndələri hər zaman olduğu kimi, bundan sonra da Prezident İlham Əliyevin yanında olacaq, onu dəstəkləməkdə davam edəcəklər.

Tədbirdə, həmçinin Neft və Qaz Sənayesi İşçiləri Həmkarlar İttifaqı Respublika Komitəsinin sədri Cahangir Əliyev, Təhsil İşçiləri Azad Həmkarlar İttifaqı Respublika Komitəsinin sədrinin müavini Mirzə Cəfərzadə və digərləri çıxışlar edərək Prezident İlham Əliyevin dövləti idarə etmək bacarığından, şəxsi keyfiyyətlərindən, qəbul etdiyi bütün qərarlarda milli maraqlarımızı əsas tutmasından, eləcə də xalqa misilsiz xidmətlərindən bəhs ediblər.

Tədbirin sonunda İlham Heydər oğlu Əliyevin Azərbaycan Respublikasının Prezidenti seçilməsinin 20-ci ildönümü ilə əlaqədar AHİK-in bəyanatı oxunub.