Aprelin 2-də “Socar Tower”, “Alov qüllələri”, Qız qalası, “Hilton” otel, “Bakı Kristal Zal” kimi obyektlər və memarlıq abidələri Dünya Autizm Maarifləndirmə Günü ilə əlaqədar mavi rənglə işıqlandırılıb.

AZƏRTAC xəbər verir ki, aksiya ictimaiyyətin diqqətini autizmli şəxslər və onların problemlərinə yönəltmək, autizm haqqında kütləvi maarifləndirmə aparmaq məqsədilə həyata keçirilib.

Hər il aprelin 2-də Dünya Autizm Maarifləndirmə Günü, aprel ayının isə Dünya Autizm Maarifləndirmə Ayı kimi qeyd edildiyini bildirən "Birgə və Sağlam" İctimai Birliyinin təsisçisi və direktoru Aytən Eynalova fikirlərinə belə davam edib: "Autizm anadangəlmə olan və ömürboyu davam edən neyroinkişaf pozuntusudur. Son statistik məlumatlara görə, dünyada yeni doğulan hər 36 uşaqdan biri autizm riski daşıyır. Son bir neçə onillik ərzində autizm statistikasındakı dinamika həmin sayın artacağını proqnozlaşdırmağa əsas verir. Bu isə autizm məsələsinə ciddi yanaşmağı tələb edir. Aprel ayı ərzində autizmə, neyromüxtəlifliyə və inklüzivliyə diqqət çəkməyə çalışılır. Həmin tədbirlər çərçivəsində hər il aprelin 2-də dünya miqyasında mötəbər binaların mavi rənglə işıqlandırılması aksiyası keçirilir. Aprel ayında intensiv maarifləndirmə işləri aparan “Birgə və Sağlam” İctimai Birliyi həmin beynəlxalq aksiyaya qoşularaq Bakıda bir neçə mötəbər binanın mavi rəngdə işıqlandırılması üçün təşəbbüslə çıxıb edib. Bu gün paytaxtın bir çox tanınan abidələri mavi rənglə işıqlandırıldı. Çünki autizmli oğlanların sayı, qızların sayından daha çoxdur. Biz də bu günün çağırışını etmək üçün 10-a yaxın autizmli gənclə toplaşdıq və "Autizm - fərqli və bizdən biri" çağırışını etdik.

Ümumiyyətlə, on bir ildir ki, fəaliyyət göstərən “Birgə və Sağlam” İctimai Birliyi autizmli şəxslərin təhsili, sağlamlığı, sosial rifahı və məşğulluğu istiqamətində əhəmiyyətli layihələr icra edir. Təşkilat son illər ərzində Heydər Əliyev Fondu, həmçinin bir sıra dövlət və özəl qurumların dəstəyi ilə autizmli şəxslərin cəmiyyətə inteqrasiyası və rifah halının yüksəldilməsi üçün davamlı olaraq təşəbbüslər göstərir. Birlik autizm sahəsində də kütləvi maarifləndirmə işləri aparır, mütəxəssislərin peşəkar inkişafına dəstək verir.

Cəmiyyətin bizim övladlarımızı qəbul etməsi və onların yanında olması üçün autizmlə əlaqəli maariflənməsinə ehtiyac var. Mən 21 yaşlı autizmli gəncin anası olaraq cəmiyyətimizə çağırış edib demək istəyirəm ki, daha çox maariflənək, onları olduğu kimi sevək".