Azərbaycanda mikro, kiçik və orta sahibkarlıq subyektləri fəaliyyət göstərən biznes subyektlərinin mütləq əksəriyyətini təşkil edir. Ümumiyyətlə, ölkənin dayanıqlı və innovativ inkişafı KOB-ların inkişaf səviyyəsi ilə sıx bağlıdır.

AZƏRTAC xəbər verir ki, bunu Azərbaycan–İsrail İnnovasiya Forumunda Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov deyib.

İdarə Heyətinin sədri əlavə edib ki, 2021-ci ildə KOB subyektləri tərəfindən elmi-tədqiqat xərcləri 21,4 milyon manat və ya təqribən 13 milyon ABŞ dolları təşkil edib. Onun sözlərinə görə, bizneslərin fəaliyyətinin müasir tələblərə uyğun təşkili və rəqabət qabiliyyətinin artırılması baxımından elmi yeniliklərin biznesə inteqrasiyası vacibdir. Bu məqsədlə, 2021-ci ildən etibarən KOB subyektlərinin təhsil, elm, tədqiqat və dəstək layihələrinin maliyyələşdirilməsinə start verilib.