Güclü təsirə malik narkotik vasitələrdən istifadə zamanı həzz hissi iki-üç həftə davam edir. Sonra həmin insanlar ağrını kəsmək üçün bundan istifadə edirlər. Narkotik maddə istifadəçilərinin böyük əksəriyyəti maarifləndirmə işinin az olduğunu deyirlər. İlk istifadədən sonra narkotikdən psixoloji asılılıq yaranır. Sonra isə bu, fiziki asılılığa çevrilir.

AZƏRTAC xəbər verir ki, bunu Respublika Narkoloji Mərkəzin baş direktoru Orxan Cəfərov mətbuat konfransında deyib.

Mərkəzdə pasiyentlərin uğurla müalicə keçdikdən sonra altı ay ərzində psixoloqların nəzarətində olduğunu deyən O.Cəfərov maarifləndirici tədbirlərin daha çox 11-14 yaşlı yeniyetmələr arasında aparılmasının vacibliyini vurğulayıb: “Məktəblərdə maarifləndirici tədbirlərin aparılması mütləqdir. Valideynlər övladları üçün xüsusi plan hazırlamalı və onu nəzarətdə saxlamalıdır. Hazırda Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının 802 - qaynar xətti fəaliyyət göstərir ki, burada da anonimlik qorunur”.