Kiçik və Orta Biznesin İnkişafı Agentliyi (KOBİA) yanında İctimai Şuranın təşkilatçılığı, KOBİA və Azərbaycan Sahibkarlar (İşəgötürənlər) Təşkilatları Milli Konfederasiyasının (ASK) dəstəyi ilə "Türk iş adamları birlikləri ilə əməkdaşlıq" mövzusunda ictimai dinləmə keçirilib.

AZƏRTAC xəbər verir ki, ictimai dinləmədə ölkəmizdə fəaliyyət göstərən türk iş adamlarının fəaliyyəti, Azərbaycan və Türkiyə sahibkarları arasında əlaqələrin genişləndirilməsi imkanları, dövlət-özəl əməkdaşlığının mövcud əlaqələrin inkişafına verə biləcəyi töhfə, çətinliklər və onların həlli istiqamətində birgə tədbirlər müzakirə edilib. Tədbirdə hər iki ölkənin iş adamları arasında mövcud olan əməkdaşlıq platformalarının inkişaf etdirilməsi və onlar çərçivəsində ortaq layihələrin icrası, Azərbaycan iqtisadiyyatının prioritet sahələrinə türk iş adamları tərəfindən investisiya qoyuluşu imkanları da nəzərdən keçirilib.

Tədbirdə çıxış edən KOBİA-nın İdarə Heyətinin sədri Orxan Məmmədov, ASK-ın prezidenti Məmməd Musayev, KOBİA yanında İctimai Şuranın sədri Fərhad Qaraşov, “MÜSİAD Azərbaycan”ın İdarə Heyətinin sədri Rəşad Cabirli, ATİB-in sədri Mürsəl Rüstəmov və TÜİB-in İdarə Heyətinin sədri Hüseyin Büyükfırat ölkələrimiz arasında əlaqələrin bütün istiqamətlərdə yüksələn xətlə inkişaf etdiyini, əməkdaşlığın müsbət dinamikasının biznes subyektləri arasında əlaqələrin daha da genişlənməsinə, birgə layihələrin icrasına və investisiya qoyuluşuna öz müsbət töhfəsini verdiyini vurğulayıb, biznes dairələri arasında əməkdaşlıq perspektivlərinə dair fikir və təkliflərini bölüşüblər.

İctimai dinləmədə türk iş adamları və yerli KOB-lar arasında əməkdaşlığın genişləndirilməsi, hər iki ölkə sahibkarlarının iştirakı ilə birgə təşəbbüs, layihə və tədbirlərin icrası, təcrübə mübadiləsi, yeni əməkdaşlıq istiqamətləri müzakirə olunub, sahibkarların təklifləri dinlənilib, sualları cavablandırılıb.