Odlar Yurdu Universitetində sahibkar və tələbələr arası “1-ci Milli Biznes Forum” təşkil olunub. Forum dövlət başçısı İlham Əliyevin prezident seçkilərində inamlı qələbəsinə həsr olunub.

AZƏRTAC xəbər verir ki, tədbirə ilk ev sahibliyi edən universitet isə Odlar Yurdu Universitetidir. Tədbirin əsas məqsədi tələbələrə motivasiya olmaq, onları maarifləndirmək və cəmiyyətə faydalı şəxslər kimi yetişdirməkdir.

Forumda Odlar Yurdu Universitetinin rektoru Əhməd Vəliyev qonaqları və tələbələri salamlayaraq bildirilib ki, sahibkarlıq çox şərəfli bir işdir.

“Ulu Öndər Heydər Əliyevin dövründə və bu gün də Prezident İlham Əliyevin siyasəti nəticəsində sahibkarlıq fəaliyyəti yüksək qiymətləndirilir. Bu gün yüksəksəviyyəli mütəxəssislərin hazırlanması üçün bu forumu yüksək qiymətləndirirəm”, - deyə rektor qeyd edib.

Tədbirdə Azərbaycan Dövlət İnformasiya Agentliyinin Hüquq və İnsan Resursları Departamentinin müdiri (AZƏRTAC), Azərbaycan Respublikası Vəkillər Kollegiyasının üzvü, Azərbaycan Respublikası Ədliyyə Nazirliyinin yanında Məhkəmə Ekspertizası Mərkəzinin doktorantı, Azərbaycan Dövlət İmtahan Mərkəzinin eksperti, III “Yüksəliş” müsabiqəsinin finalçısı, Hüquqi, Sosial Araşdırmalar və Maarifləndirmə Mərkəzinin həmtəsisçisi və sədri Esmira Tağıyeva sahibkarlarla tələbələr arasında keçirilən bu tədbirə görə universitetin rəhbərliyinə və təşkilatçı “Mirtalıblı group”a təşəkkürünü bildirib. Öz peşə fəaliyyəti haqqında məlumat verən E.Tağıyeva vurğulayıb ki, hər bir tələbə peşə səviyyəsini, iş təcrübəsini artırmağı öz qarşısına məqsəd qoymalıdır.

“Mənim üçün məhz Prezident İlham Əliyevin qələbəsinə həsr olunan tədbirdə çıxış etmək çox şərəflidir. Məktəb illəri zamanı tarix kitablarında sərkərdə, dövlət başçılarının qalibiyyəti haqqında oxuyurduq, bu gün isə Əsrin qalibi, Ali Baş Komandanımız Prezident İlham Əliyevin rəhbərliyi ilə həyata keçirilən siyasət nəticəsində şanlı bir tarixin canlı şahidi olduq. Qazandığımız nailiyyətlərin, uğurların arxasında ailəmizin, dövlətimizin təhsil sahəsində, o cümlədən hər bir sahədə ayırdığı diqqət və göstərdiyi dəstək durur. Ulu Öndər Heydər Əliyevin də dediyi kimi “Təhsil millətin gələcəyidir” və dövlətimizin həyata keçirdiyi təhsil sistemi və bu sahədəki inkişafyönlü proqramlar, islahatlar təhsilimizin inkişafına davamlı xarakter verməklə, onu dünya standartlarına uyğunlaşdırmağa xidmət edir. Qeyd olunanlarla yanaşı, peşəkar kadr kimi formalaşmaq və parlaq gələcək üçün hər kəs özünü uğur qazanmağa inandırmalı və məqsədlərinə doğru qətiyyətlə addımlamalıdır”, - deyə Esmira Tağıyeva vurğulayıb.

Tədbirdə çıxış edən nasir, şair, tərcüməçi, kinodramaturq Baba Vəziroğlu, Dünya Azərbaycanlıları Mədəniyyət mərkəzinin vitse-prezidenti, sosial məsələlər üzrə ekspert Hacı Quliyev, sahibkar Elnur Allahverdiyev, rəssam Mehriban Alışova və digər iştirakçılar tələbələrin sahibkarlıq fəaliyyəti istiqamətində aparılan maarifləndirmə və onların cəmiyyətə faydalı şəxslər kimi yetişmələrində forumun əhəmiyyətini yüksək qiymətləndiriblər.

Tədbir bədii hissə ilə davam edib.