×
Fevralın 7-nə təyin edilmiş növbədənkənar Azərbaycan Respublikası Prezidenti seçkiləri ilə əlaqədar yanvarın 18-də 24 saylı Nizami birinci seçki dairəsinin dairə seçki komissiyasında məntəqə seçki komissiyalarının sədr, katib və üzvləri üçün treninqlərə başlanılıb.
AZƏRTAC xəbər verir ki, treninqdə çıxış edən 24 saylı Nizami birinci seçki dairəsinin dairə seçki komissiyasının sədri Niyazi Nəcəfov prezident seçkilərində şəffaflığın və aşkarlığın təmin edilməsi üçün məntəqə seçki komissiyalarında hər cür şəraitin yaradıldığını, onların zəruri avadanlıqlarla təchiz olunduğunu söyləyib.
O bildirib ki, yanvarın 22-dək davam edəcək təlimlərin məqsədi seçki komissiyaları üzvlərinin məlumatlılığını və peşəkarlığını artırmaqdır.
MSK tərəfindən hazırlanmış slaydların və əyani vəsaitlərin köməyi ilə iştirakçılara səsvermə günü məntəqə seçki komissiyaları üzvlərinin rolu və vəzifələri, səsvermə otağının təşkil edilməsi qaydası, seçki günü müşahidəçilərin hüquqları, məntəqənin açılması, səsvermə ilə bağlı məlumatların verilməsi saatları, səsvermədə iştirak edən vətəndaşların barmağının mürəkkəblə işarələnməsi, hansı halda seçicinin səsvermə hüququndan istifadə edə bilməyəcəyi, səslərin hesablanması və s. ilə bağlı məlumatlar verilib. Təlim iştirakçılarına bununla bağlı yaddaş kitabçası təqdim edilib.
Niyazi Nəcəfov AZƏRTAC-a müsahibəsində seçkilərə hazırlıq işlərinin uğurla davam etdiyini, məntəqələrdə seçkilərin şəffaf və demokratik keçirilməsi, komissiya üzvlərinin normal fəaliyyəti üçün zəruri şəraitin yaradıldığını deyib. Bildirib ki, seçki məntəqələrinin 10-da veb-kamera, eyni zamanda, sağlamlıq imkanları məhdud seçicilər üçün panduslar quraşdırılıb. “Dairədəki seçki məntəqələrinin sayı 36, seçicilərin sayı isə 49 min 444 nəfərdir. Qadınların sayı ümumi sayın 50 faizindən çoxdur. İlk dəfə səs verənlərin sayı 890, yaşlı seçicilərin sayı isə 1101 nəfərdir”, - deyə o əlavə edib.
Dairə seçki komissiyasının sədri 401 müşahidəçinin qeydiyyatdan keçdiyini bildirib.
Qeyd edək ki, treninqlər 25 saylı Nizami ikinci, 18 saylı Nərimanov-Nizami-Binəqədi seçki dairəsinin dairə seçki komissiyalarında da keçirilir.