Nəsimi rayonunda yerləşən 1 nömrəli Körpələr evində Yeni il münasibətilə bayram tədbiri təşkil olunub.

AZƏRTAC xəbər verir ki, “Kiçik mələklərin qış nağılı” adlı şənlik Səhiyyə Nazirliyinin dəstəyi ilə keçirilib.

Sevgi və həmrəylik ruhunda təşkil olunan tədbir uşaqlar üçün əsl bayram ab-havası yaradıb. Körpələr müxtəlif rəqs proqramları ilə çıxış edib, mahnılar səsləndirib, hazırlanan səhnə kompozisiyalarında fəal iştirak ediblər.

Körpələr evinin baş həkimi Dürdanə Budaqova tədbirdə çıxış edərək bildirib ki, müəssisənin fəaliyyəti dövlətimizin sosial siyasətinin əsas istiqamətlərindən biri olan uşaqların sağlamlığının qorunmasına xidmət edir. Onun sözlərinə görə, körpələrin sağlam və təhlükəsiz mühitdə böyüməsi, hərtərəfli qayğı ilə əhatə olunması kollektivin əsas vəzifəsidir.

Dürdanə Budaqova qeyd edib ki, Heydər Əliyev Fondunun prezidenti Mehriban Əliyeva və Fondun vitse-prezidenti Leyla Əliyeva körpələr evlərinin fəaliyyətini daim diqqət və qayğı ilə əhatə edirlər. O vurğulayıb ki, bu diqqət və dəstək körpələr evlərində həyata keçirilən işlərin keyfiyyətinin daha da yüksəldilməsinə mühüm töhfə verir.

Baş həkim bildirib ki, körpələr evində çalışan əməkdaşlar üzərlərinə düşən məsuliyyəti dərindən dərk edir, öz peşə borclarını böyük fədakarlıqla yerinə yetirirlər. “Burada çalışan hər bir əməkdaş uşaqlara yalnız tibbi xidmət göstərmir, eyni zamanda, onlara ana qayğısı, sevgi və diqqət bəxş edir. Gecə-gündüz demədən körpələrimizin yanında olan əməkdaşlarımızın zəhməti əvəzolunmazdır”, – deyə o vurğulayıb.

Dürdanə Budaqova Səhiyyə Nazirliyinə və aidiyyəti qurumlara göstərdikləri diqqət və dəstəyə görə təşəkkürünü bildirib.

Çıxışında kollektivin birliyini və peşəkarlığını xüsusi vurğulayan baş həkim qeyd edib ki, uşaqların sağlam gələcəyi naminə görülən bu işlər böyük məsuliyyət və vicdan tələb edir. “Bizim əsas məqsədimiz körpələrimizin sağlam, təhlükəsiz və sevgi dolu mühitdə böyüməsini təmin etməkdir”, – deyə o əlavə edib.

Sonda Dürdanə Budaqova 31 Dekabr - Dünya Azərbaycanlılarının Həmrəyliyi Günü və Yeni il bayramı münasibətilə kollektiv üzvlərini və körpələri təbrik edib, onlara xoşbəxt gələcək arzulayıb.

Tədbir bədii hissə ilə davam edib. Körpələr evinin sakinlərinin ifa etdiyi milli və xarici rəqslər, uşaqların iştirakı ilə nümayiş etdirilən səhnəciklər bayram əhvali-ruhiyyəsini daha da yüksəldib. Şaxta baba və Qar qızın səhnəyə çıxışı tədbirin ən sevilən və alqışlanan məqamlarından olub. Onlar uşaqlara bayram hədiyyələri təqdim edib, yeni il yolkası ətrafında balacalarla birlikdə rəqs ediblər.

Körpələr evinin əməkdaşları uşaqlara qoşularaq onların sevincinə şərik olublar.