Mayın 21-də Rəşid Behbudov adına Dövlət Mahnı Teatrında Bakı Beynəlxalq Multikulturalizm Mərkəzinin (BBMM) dəstəyi və Talış icmasının təşkilatçılığı ilə folklor tədqiqatçısı Fərbiyə Şabanovanın 85 illik yubileyinə və onun yaratdığı “Əvəsor” folklor qrupunun 60 illiyinə həsr olunan “Talış folkloru konserti” keçirilib.

AZƏRTAC xəbər verir ki, tədbir Azərbaycan Respublikasının Dövlət Himninin səsləndirilməsi ilə başlayıb.

BBMM-in icraçı direktoru Rəvan Həsənov bildirib ki, Azərbaycan çoxəsrlik tarixə və zəngin mədəni irsə malik ölkə kimi müxtəlif etnik icmaların harmonik şəkildə bir arada yaşadığı, multikultural ənənələrin qorunub saxlandığı nadir coğrafiyalardandır. Bu baxımdan, ölkədə yaşayan xalqların mədəniyyəti, dili və folkloruna xüsusi önəm verilir, uğurlu multikulturalizm siyasəti aparılır. O vurğulayıb ki, Azərbaycanda multikulturalizm siyasətinin əsası Ulu Öndər Heydər Əliyev tərəfindən qoyulub və bu gün Prezident İlham Əliyev tərəfindən uğurla davam etdirilir. R. Həsənov diqqətə çatdırıb ki, talışların folkloru Azərbaycanın ədəbi-mədəni irsinin ayrılmaz hissəsidir. Azərbaycanda yaşayan xalqların folklorunun, mədəniyyətinin qorunması və gələcək nəsillərə ötürülməsi ölkəmizin multikultural dəyərlərinin yaşadılması baxımından xüsusi əhəmiyyət daşıyır.

Talış icmasının ağsaqqalı professor İmamverdi Həmidov deyib ki, folklor sadəcə ədəbi-bədii miras deyil, həm də kollektiv kimliyin, dilin və adətlərin yaşadılmasının əsas dayağıdır. Talış folkloru da bu xalqın topladığı ictimai-mədəni təcrübəni, inancları, həyat tərzini ifadə edən zəngin xəzinədir, talışların milli ruhunu yaşadan, onu nəsildən-nəslə daşıyan yaddaşdır.

Tədbirdə çıxış edən Milli Məclisin deputatları Anar İsgəndərov və Azər Badamov, Bakı Dağ Yəhudiləri Dini İcmasının sədri Milix Yevdayev, Azərbaycanda Rus icmasının sədri, Milli Məclisin deputatı Mixail Zabelin və riyaziyyat üzrə fəlsəfə doktoru Hilal Məmmədov bildirib ki, hər bir xalqın kimliyinin, keçmişinin və mənəvi dünyasının ifadə forması olaraq folklor böyük əhəmiyyətə malikdir. Azərbaycanda yaşayan etnik azlıqların multikultural dəyərləri nəinki yaşadılır, eyni zamanda, tanıdılır və dəyərləndirilir. Çünki ölkəmizdə yaşayan hər bir etnik azlığın folkloru Azərbaycan mədəniyyətinin ayrılmaz hissəsidir.

Tədbirin bədii hissəsində “Əvəsor”, “Hovəli”, “Nənələr”, “Babalar”, “Rəfte”, “Halay” folklor qrupları çıxış edib, həmçinin əl işlərindən ibarət sərgi nümayiş olunub.

Sonda F.Şabanova çıxış edərək, tədbirin təşkilatçı və iştirakçılarına təşəkkürünü bildirib.