Həyata keçirilən hər bir layihə istər-istəməz ətraf mühitə ciddi ziyan vurur, ona mənfi təsir göstərir. Muğanlı-İsmayıllı-Qəbələ avtomobil yolunun yenidən qurulması layihəsində də bizim öncəliyimiz dəyən ziyanın kompensasiya olunmasıdır. Şahdağ Milli Parkının 5.1 hektarı, o cümlədən 26.6 hektar meşə fondu ərazisi layihə altına düşür. Həmin ərazilər hökmən bərpa olunmalıdır.

AZƏRTAC xəbər verir ki, bunu Dövlət Ekoloji Ekspertiza Agentliyinin İdarə Heyətinin sədri Mirsalam Qənbərov Muğanlı-İsmayıllı-Qəbələ avtomobil yolunun yenidən qurulması layihəsi üzrə təşkil olunan ictimai dinləmədə deyib.

Agentliyin İdarə Heyətinin sədri bildirib ki, ilkin qiymətləndirməyə görə, 8 min 48 ağacın layihə altına düşdüyü bəlli olub: "İstəyirik ki, yolun ətrafında nə qədər meşəsiz ərazi varsa, orada ağacların əkilməsinə şərait yaradılsın. Salınacaq ərazilərdə ağacların, yaşıllıqların suvarılması üçün damcı suvarma sistemi, suyun mütəmadi təmin olunması məsələləri layihədə həllini tapsın. Vacib ekoloji məsələlər layihədə öz əksini tapacağı halda müsbət istiqamətdə razılığa gəlmək mümkündür. Biz istəyərdik ki, ətraf mühitin qiymətləndirilməsi sənədində yer alan bütün parametrlər layihədə əks olunsun. Yolun genişləndirilməsi nəticəsində ətraf mühitə dəyən zərərin miqdarından daha çox kompensasiyanın həyata keçirilməsi arzuolunandır. Müzakirələrdə buna nail olmaq istəyirik. İctimai dinləmənin də məqsədi bu sahə üzrə mütəxəssislərin sağlam fikirlərinin veriləcək rəydə şərt kimi qoyulması və layihənin razılaşdırılmasına nail olmaqdır".

M.Qənbərov qeyd edib ki, yolun birinci lotu - 14 kilometr üzrə müzakirələr aparılıb və razılaşdırılıb. Əsas müzakirə mənbəyi qalan 3 lot, yəni 63 kilometr üzrədir.