Oktyabrın 3-də Milli Məclisdə “Dövlət ehtiyatları haqqında” yeni qanun layihəsi müzakirə olunur.

AZƏRTAC xəbər verir ki, bununla bağlı məsələ parlamentin İqtisadi siyasət, sənaye və sahibkarlıq komitəsinin iclasında müzakirəyə çıxarılıb.

Birinci oxunuşda təqdim edilən “Dövlət ehtiyatları haqqında” qanun layihəsi 4 fəsil, 14 maddədən ibarətdir. Sənəd Azərbaycan Respublikası Konstitusiyasının 94-cü maddəsinin I hissəsinin 1-ci və 20-ci bəndlərinə uyğun olaraq dövlət ehtiyatlarının yaradılması və idarə edilməsi sahəsində fəaliyyətin təşkilati, hüquqi və iqtisadi əsaslarını müəyyən edir.

Sənəddə analoji mallar, bazar iştirakçısı, dövlət ehtiyatlarının brondan çıxarılması və borc verilməsi, əvəzləşdirilməsi, strateji əhəmiyyətli mallar, strateji ehtiyatlar və s. kimi anlayışlar yer alıb.

İclasın gündəliyində yer alan ikinci məsələ isə “Antiinhisar fəaliyyəti haqqında”, “İstehlakçıların hüquqlarının müdafiəsi haqqında”, “Mülki müdafiə haqqında”, “Taxıl haqqında”, “Milli təhlükəsizlik haqqında”, “Dövlət sirri haqqında”, “Azərbaycan Respublikasında səfərbərlik hazırlığı və səfərbərlik haqqında” və “Qiymətli metallar və qiymətli daşlar haqqında” qanunlarda dəyişikliklərlə bağlı qanun layihəsidir. Birinci oxunuşda müzakirəyə çıxarılan sənəd uyğunlaşdırma xarakteri daşıyır.