Cari ilin yanvar-iyul aylarında Azərbaycanın Türkdilli Dövlətlərin Əməkdaşlıq Şurasına (TDƏŞ) üzv dövlətlər və Macarıstanla olan ticarət dövriyyəsinin həcmi 2,6 milyard dollar olub.

AZƏRTAC xəbər verir ki, bu barədə Azərbaycanın iqtisadiyyat naziri Mikayıl Cabbarov sentyabrın 10-da Bakıda keçirilən TDƏŞ-in iqtisadiyyat nazirlərinin 10-cu görüşündə deyib.

Nazir bildirib ki, bununla yanaşı, ötən ilin müvafiq dövrü ilə müqayisədə bu ilin yeddi ayında TDƏŞ ölkələri və Macarıstana qeyri-neft ixracı 75 faiz artıb.