Noyabrın 25-də Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyində Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının sabiq üzvü, Humanitar Tədqiqatlar Cəmiyyətinin sabiq sədri, mərhum konfliktoloq, hüquq müdafiəçisi Əvəz Həsənovun xatirəsinə həsr olunmuş “Postmüharibə dövründə Azərbaycan QHT-nin sülh quruculuğunda rolu” mövzusunda tədbir keçirilib.

AZƏRTAC xəbər verir ki, tədbirdə Agentliyin Müşahidə Şurasının üzvləri İsrayıl İsgəndərov, Azər Allahverənov, Günel Səfərova, İlqar Orucov, Əvəz Həsənovun xanımı Mehriban Həsənova, ailə üzvləri, qeyri-hökumət təşkilatları və media nümayəndələri iştirak ediblər.

Əvvəlcə Əvəz Həsənovun xatirəsi bir dəqiqəlik sükutla yad edilib. Sonra mərhum konfliktoloqun xatirəsinə həsr edilmiş videoçarx nümayiş olunub.

Agentliyin Müşahidə Şurasının üzvləri İsrayıl İsgəndərov, Azər Allahverənov, Günel Səfərova, İlqar Orucov çıxış edərək Əvəz Həsənovun xatirəsinə həsr olunmuş “Postmüharibə dövründə Azərbaycan QHT-nin sülh quruculuğunda rolu” mövzusunda fikirlərini və onunla bağlı xatirələrini bölüşüblər. Çıxışçılar bildiriblər ki, vətəndaş hüquqlarının aliliyinə əsaslanan demokratik dövlət quruculuğunu strateji məqsədlərindən biri kimi bəyan etmiş Azərbaycanda görüləcək əsas işlərdən biri də qeyri-hökumət təşkilatlarının (QHT) formalaşması və inkişafı üçün münbit siyasi və hüquqi şəraitin təmin olunmasıdır. Qeyd olunub ki, Azərbaycanda III sektorun fəaliyyətini tənzimləyən kifayət qədər baza formalaşdırılıb. İctimai müzakirələr daim dəyişən dinamikaya söykəndiyindən qanunvericiliyin də islahatlarla müşahidə edəcəyi istisnasız bir prosesdir.

Çıxış edənlər, həmçinin regionda yaranmış yeni reallıqlardan bəhs ediblər, Azərbaycanın həmişə sülhə açıq olduğunu və buna töhfə verdiyini söyləyiblər. Bildirilib ki, əslən kəlbəcərli olan Əvəz Həsənovun ən böyük arzusu Kəlbəcərin işğaldan azad olunduğunu görmək idi. Bugünkü tədbirin təşkili də məhz Kəlbəcərin erməni işğalından azad olunmasının ikinci ildönümü günündə baş tutub.

Çıxışlardan sonra tədbir qeyri-hökumət təşkilatlarının qarşılıqlı diskussiyası şəkilində davam edib və Əvəz Həsənovla bağlı xatirələr bölüşülüb