Məktəbəqədər təhsilin təşkilinə dair imkanlar genişləndirilir. Belə ki, valideynlər və ya uşağın digər qanuni nümayəndələri məktəbəqədər təhsili yalnız müvafiq məktəbəqədər təhsil müəssisələrində və ya ailədə deyil, həm də məktəbdənkənar təhsil müəssisələrində həyata keçirə biləcəklər.

AZƏRTAC xəbər verir ki, bu, Milli Məclisin Elm və təhsil komitəsinin iyunun 11-də keçirilən iclasında “Təhsil haqqında” Qanunda dəyişiklik edilməsi barədə qanun layihəsində öz əksini tapıb.

Qeyd edək ki, mövcud qanunvericilik valideynlərə məktəbəqədər təhsili yalnız məktəbəqədər təhsil müəssisələrində, ümumtəhsil müəssisələrinin müvafiq bölmələrində və ya ailə daxilində təşkil etməyə icazə verir. Yeni təklif bu sıraya məktəbdənkənar təhsil ocaqlarını da əlavə edir.

Bununla yanaşı, “Məktəbəqədər təhsil haqqında” Qanuna da uyğun məzmunda dəyişiklik edilməsi nəzərdə tutulur. Bu dəyişikliklər məktəbəqədər təhsilin daha çevik və əlçatan formada təşkilinə imkan verəcək.