İcbari Tibbi Sığorta üzrə Dövlət Agentliyi media və qeyri-hökumət təşkilatlarının nümayəndələrini icbari tibbi sığorta haqqında məlumatlandırıb.

AZƏRTAC xəbər verir ki, təlimin keçirilməsində əsas məqsəd vətəndaş cəmiyyəti və media nümayəndələrinin icbari tibbi sığorta sisteminin işləmə mexanizmi haqqında məlumatlılıq səviyyəsini artırmaq, onlarla əməkdaşlıq imkanlarını genişləndirmək və gücləndirmək olub.

Agentliyin Marketinq və ictimaiyyətlə əlaqələr departamentinin rəhbəri Aynurə Əhmədova əhalinin icbari tibbi sığorta barədə məlumatlandırılmasında qeyri-hökumət təşkilatları və media mənsublarının rolunun böyük əhəmiyyət daşıdığını bildirib, “Bu səbəbdən media mənsublarına və bu sahədə maarifləndirmə tədbirləri təşkil edən vətəndaş cəmiyyətinə icbari tibbi sığorta sisteminin qaydaları barədə dolğun məlumatlar vermək zəruridir”,- deyə A.Əhmədova qeyd edib.

Təqdimat zamanı iştirakçılar icbari tibbi sığorta sistemindən istifadə qaydası, sığorta haqlarının məbləği, xidmətlər zərfinə daxil olan tibbi xidmətlər, göndərişlərin verilməsi qaydası və digər məsələlər haqqında məlumatlar əldə ediblər