İyulun 7-də İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti “Heydər Əliyev İli” çərçivəsində media nümayəndələri üçün "İstehlakçı hüquqlarının qorunması və rəqabətin təmin olunması mexanizmləri" adlı maarifləndirici tədbir keçirib.

AZƏRTAC xəbər verir ki, seminarda antiinhisar siyasəti, haqsız rəqabətə qarşı mübarizə, istehlakçı hüquqlarının müdafiəsi sahəsində həyata keçirilən tədbirlər barədə məlumat verilib.

Dövlət Xidmətinin rəis müavini Elnur Bağırov bildirilib ki, Ulu Öndər tərəfindən Azərbaycanda dövlət senzurasının ləğvi ilə ölkədə söz və mətbuat azadlığının təməli qoyulub, demokratik mövqeyin, ictimai və siyasi rəyin açıq ifadəsinə təkan verilib. Daha sonra antiinhisar siyasəti, haqsız rəqabətə qarşı mübarizə, istehlakçı hüquqlarının müdafiəsi sahəsində Dövlət Xidməti tərəfindən həyata keçirilən tədbirlər barədə məlumat verilib. Qeyd olunub ki, təlimin keçirilməsində məqsəd müvafiq sahələrdə jurnalistlərin bilik və təcrübələrini artırmaq, onların ixtisaslaşmasına dəstək göstərməkdir.

Seminarda Dövlət Xidmətinin nümayəndələri “İstehlakçıların əsas hüquqları və müdafiəsində inzibati orqanlar və məhkəmələrin rolu” və “Antiinhisar, haqsız rəqabət və reklam qanunvericiliyinə nəzarət sahəsində Dövlət Xidmətinin vəzifə və səlahiyyətləri” mövzularında təqdimatlarla çıxış ediblər. Hər iki mövzu ilə bağlı KİV nümayəndələrini maraqlandıran suallar interaktiv formada Dövlət Xidmətinin nümayəndələri tərəfindən ətraflı cavablandırıb.

Sonda seminar iştirakçılarına sertifikatlar təqdim edilib, onlara fəaliyyətlərində uğurlar arzulanıb.