Nizami Gəncəvi kimi böyük şəxsiyyətləri öyrənmək, tədqiq etmək, onun ideyalarını yaymaq çox vacibdir. Nizami yaradıcılığıni uşaqlara məktəbdə mükəmməl öyrətmək lazımdır. Çünki onun yazdıqları başdan-başa həyat dərsi, ibrətamiz biz mənbədir.

AZƏRTAC xəbər verir ki, bu fikirləri İslam Tarixi, İncəsənəti və Mədəniyyəti Araşdırma Mərkəzinin (IRCICA) baş katibi, professor Mahmut Erol Kılıç Azərbaycan İnvestisiya və Mədəniyyət Sammiti çərçivəsində keçirilən “Regionun əsas sosial və iqtisadi çağırışları: Nizami Gəncəvi üzrə baxış” mövzusuna həsr olunmuş panel iclasda deyib.

“Biz mükəmməl cəmiyyət yetişdirmək istəyiriksə özümüzdə dəyişiklik etməliyik. Hər bir insanın özünü tanıması onu rəbbini tanımasına gətirəcəkdir. Çünki insanın özünü tanıdıqdan sonra Allahını tanıya bilər. Bir çox filosoflar var ki, biz onları mütləq kəşf etməliyik. Cəhalət alimləri tanımamaqdan başlayır. Biz yenidən Nizami Gəncəvilər yetişdirmək haqqında düşünməliyik. Nizami Gəncəvini oxusaq bütün müsəlman ölkələri bizə qoşularaq onu yenidən kəşf edər. Çünki insanlar Nizami Gəncəvi dəyərlərini bilsə tolerant bit cəmiyyət quracaq”, - deyə professor bildirib.