Ramil Süleymanov Vətən müharibəsindən əvvəl Tovuz döyüşlərinin iştirakçısı olub. Həmin ilin sentyabrında isə Vətən müharibəsinin ilk günündən silaha sarılıb. Lakin kiçik çavuşun döyüş yolu sentyabrın 28-də Kəlbəcərin Murov yüksəkliyindəki Camışdağ postunda qırılıb.

“Düşmən hərbçilərinin minaatandan atdıqları mərmilər döyüş mövqeyimizin 12 metrliyinə düşdü. Başımdan və ayağımdan ağır yara aldım. Təəssüf ki, aldığım yara məni hərbçi yoldaşlarımdan və döyüş mövqeyindən araladı. Lakin əldə etdiyimiz böyük Qələbədə pay sahibi olduğuma görə çox qürurluyam”, - deyə kiçik çavuş AZƏRTAC-a bildirib.

3-cü dərəcəli müharibə əlili daha sonra deyib: “Vətən müharibəsi döyüşçülərinə göstərilən diqqət və qayğı məmnunluq doğurur. Bu gün minik avtomobili ilə təmin edilməyim də bu qayğının daha bir ifadəsidir”.