Aprelin 25-də Ekologiya və Təbii Sərvətlər Nazirliyində “Ecotracker” mobil tətbiqinin rəsmi təqdimat mərasimi keçirilib. Layihə “EkoSfera” Ekoloji-Sosial Mərkəzi İctimai Birliyinin təşəbbüsü və təşkilatçılığı, Ekologiya və Təbii Sərvətlər Nazirliyi və Qeyri-Hökumət Təşkilatlarına (QHT) Dövlət Dəstəyi Agentliyinin dəstəyi ilə COP29 çərçivəsində QHT-lər üçün elan edilmiş qrant müsabiqəsi əsasında hazırlanıb.

Tədbirdə Ekologiya və Təbii Sərvətlər Nazirliyinin, QHT-lərə Dövlət Dəstəyi Agentliyinin, eləcə də təhsil müəssisələrinin nümayəndələri, nazirlik yanında İctimai Şura üzvləri, yerli və beynəlxalq ekspertlər iştirak ediblər.

AZƏRTAC xəbər verir ki, tədbirdə çıxış edən “EkoSfera” Ekoloji-Sosial Mərkəzi İctimai Birliyinin rəhbəri Firuzə Sultan-zadənin sözlərinə görə, “Ecotracker” “Zero Waste” (Sıfır Tullantı) konsepsiyası ilə yanaşı, Azərbaycanda dayanıqlı həyat tərzini təşviq edən ilk milli mobil tətbiqdir. May ayından etibarən istifadəyə veriləcək tətbiq geniş ictimaiyyət, xüsusilə də gənclər arasında ekoloji savadlılığın artırılması, davamlı davranış vərdişlərinin formalaşdırılması və fərdi ekoloji məsuliyyətin təşviqi məqsədi daşıyır.

F.Sultanzadə, həmçinin “Ecotracker” layihəsinin COP29 tədbirinə hazırlıq və “Yaşıl dünya naminə həmrəylik ili” çərçivəsində karbon neytrallığına keçid, ətraf mühitin qorunması və ictimai maarifləndirmə məqsədlərinə töhfə verən mühüm rəqəmsal alət kimi dəyərləndirildiyini diqqətə çatdırıb.

Sonra çıxış edən layihənin koordinatoru Günay Vəliyeva və Ekologiya və Təbii Sərvətlər Nazirliyinin sektor müdiri Mehman Nəbiyev layihənin və mobil tətbiqin ətraf mühitin mühafizəsi və tullantıların düzgün idarə olunmasında faydalı olacağına inandıqlarını bildiriblər.

Daha sonra ictimai birliyin əməkdaşı Dilarə Hacıyeva mobil tətbiqin təqdimatını edib. Qeyd olunub ki, “Ecotracker” yalnız texnoloji yenilik deyil, bu, ekoloji düşüncənin gündəlik vərdişə çevrilməsinə xidmət edən innovativ platformadır. Tətbiq vasitəsilə istifadəçilər gündəlik qida seçimlərini məhsulların ekoloji dəyəri və karbon izi əsasında qiymətləndirə, nəqliyyat vasitələrinin ekoloji təsirinə uyğun alternativlər seçə, çeşidlənmiş tullantıların təhvilini qeyd edə bilərlər. Həmin funksiyalar sayəsində istifadəçilər özlərinin iqlimə təsirini və yaratdıqları karbon izini real rəqəmlərlə müşahidə etmək imkanı əldə edirlər. Eyni zamanda, tətbiq ekoloji maarifləndirməni yalnız məktəblərlə məhdudlaşdırmır, həm də ailələr və cəmiyyətin bütün təbəqələri arasında praktik və ölçülə bilən bir davranış dəyişikliyi yaratmağı hədəfləyir.

Təqdimat zamanı tətbiqin canlı nümayişi keçirilib, funksiyaları və istifadəsi izah olunub, gələcək inkişaf istiqamətləri və təhsil sisteminə inteqrasiya imkanları müzakirə edilib.

Tədbirdə Ekologiya və Təbii Sərvətlər Nazirliyinin, QHT-lərə Dövlət Dəstəyi Agentliyinin, eləcə də təhsil müəssisələrinin nümayəndələri, nazirlik yanında İctimai Şura üzvləri, yerli və beynəlxalq ekspertlər iştirak ediblər.