Azərbaycan Respublikası Dövlət Sərhəd Xidmətinin (DSX) təşkilatçılığı ilə Qazax rayonunun işğaldan azad edilmiş kəndlərinə mediatur təşkil olunub.

AZƏRTAC xəbər verir ki, mediatur zamanı media nümayəndələrinə təhlükəsizlik qaydaları izah olunub, ərazilərdən tapılan minalar nümayiş etdirilib.

Media nümayəndələri azad olunmuş kəndlərdə erməni vandallığının bariz nümunələri olan dağıdılmış binalara baş çəkib, eləcə də xidmətə başlayan sərhəd döyüş məntəqələrinin fəaliyyəti ilə tanış olublar.

Bildirilib ki, nəzarətə götürülmüş ərazilərdə dövlət sərhədinin mühafizəsi yüksək səviyyədə təşkil olunur. Belə ki, gecə və gündüz mərkəzdən idarə olunan, yaxın və uzaq məsafələri yüksək dəqiqliklə müşahidə etməyə imkan verən müasir optik kameralar vasitəsilə qarşı tərəfin postları, dərə boşluqları nəzarətdə saxlanılır.

Ərazidə xidmət aparan Dövlət Sərhəd Xidmətinin hərbi qulluqçusu, baş leytenant Zamin Vəliyev deyib: “Məlumdur ki, bir neçə gündür Silahlı Qüvvələrin Ali Baş Komandanı Prezident İlham Əliyevin növbəti göstərişinə müvafiq olaraq Bağanis Ayrım, Aşağı Əskipara, Xeyrimli və Qızılhacılı kəndləri Dövlət Sərhəd Xidməti tərəfindən müdafiə və mühafizə olunur. Hazırda işğaldan azad olunmuş tarixi torpaqlarımızda sərhədlərimiz mühafizəyə götürülərək qarşıya qoyulmuş tapşırıqlar ən yüksək səviyyədə icra edilir. Vətən sərhədlərinin keşiyində durmaqdan fəxarət hissi keçirən sərhədçilərimiz bu müqəddəs vəzifələrin öhdəsindən layiqincə gəlmək üçün əzmlə çalışacaqlar”.

Hərbi ekspert Ədalət Verdiyev Qazaxın dörd kəndinin 30 ildən çox davam edən işğalının bir neçə gün əvvəl başa çatdığını və Dövlət Sərhəd Xidmətinin hissə və bölmələrinin yeni azad olunan əraziləri tamamilə nəzarətə götürdüyünü xatırladaraq deyib: “Qarşı tərəfin müdafiə qüvvələri sərhədin 12,7 kilometrlik ərazisində tamamilə geri çəkiliblər. Ermənistanın Quru Qoşunlarını hazırda Ermənistanın Sərhəd Xidməti əvəz edib. Həmin əraziləri azad etməyimizin hərbi və mənəvi əhəmiyyəti var. Hərbi əhəmiyyəti ondan ibarətdir ki, Azərbaycan Ordusu bir nəfər də itki vermədi. Sadəcə Ali Baş Komandanın səsləndirdiyi bəyanatdan sonra Ermənistan geri addım ataraq həmin əraziləri Azərbaycana qaytarmağa məcbur oldu. Görünür havadarlarının Ermənistana verdiyi dəstək ciddi imkanlara malik deyilmiş. Biz daha əvvəl də deyirdik ki, Ermənistan Azərbaycanla ikitərəfli formatda problemləri həll etməlidir. Kənar qüvvələrin iştirakı ilə olan görüşlərin heç biri məntiqi sonluğuna varmadı. Amma ikitərəfli formatda həm daha qısa müddətdə, həm də daha ciddi nəticələr əldə olunur ki, bu da Ermənistan üçün daha vacibdir. Çünki təhlükəsizlik konsepsiyası çökən Ermənistandır. Bu gün sərhəd xəttindən 12,7 kilometr geri çəkilən Ermənistan Ordusudur. Yəni Ermənistan Ordusunun bu gün şimal qanadı kəsilib, müdafiə və atəş sistemi tamamilə aradan qalxıb. Onlar geri çəkiliblər və orada artıq eşalonlaşdırılmış quru qoşunları yerləşdirilmir. Sərhəd qoşunları yerləşdirilir ki, onlar da ayrı-ayrı müşahidə və s. məntəqələrdə xidmət aparacaqlar. Yəni səngər sistemi olmayacaq. Digər tərəfdən Azərbaycan İcevan-Tiflis adlanan və yaxud Ermənistan-Gürcüstan magistral yolunu bir neçə istiqamətdə tamamilə vizual nəzarətə götürüb".

Hərbi ekspert bildirib ki, Ermənistanın birgə bəyanatla üzərinə götürdüyü öhdəliklərini hələ də yerinə yetirilməyən hissələri var. Ermənistan həmin öhdəlikləri çox məcbur qaldıqda yerinə yetirməyə meyilli olur: “Bizim gözləntilərimiz odur ki, bu proses davam etməlidir. Kənar qüvvələrin Ermənistanla Azərbaycan sərhədinə müdaxiləsi olmamalıdır. Bizi narahat edən üçüncü məsələ Naxçıvana yolun açılması məsələsidir. O yol açılmadan bu gün Ermənistanın Türkiyə və Azərbaycanla kommunikasiyaları qapalı vəziyyətdə qalmağa davam edəcək. Ermənistanın alternativi yoxdur. Onlar müəyyən ləngitmə zamanını da istifadə ediblər, limit bitib. Sülh bizdən çox Ermənistana lazımdır. Ermənistan istəmirsə, o zaman başqa variantlarımız var. Onların isə heç bir variantı yoxdur”.