Ötən il mənim üçün xüsusi il oldu. Yanvarda həmkarlarımızla birlikdə “Hakimiyyət formulu” proqramının 25 illiyini qeyd etdik. Televiziya efirində 25 il davam edən və bir dəfə də qrafikdən geri qalmayan layihələr çox deyil. Elə alındı ki, bu yubiley mənim şəxsi bayramımla eyni vaxta düşdü, belə ki, mənim 75 yaşım tamam oldu. Bu tarixləri birlikdə qeyd etdik. Daha sonra, aprelin 30-da Bakıda həyat yoldaşımla qızıl toyumuz oldu. Nəhayət, iyulun 29-da nə qədər acı hadisə kimi xatirəmdə qalsa da, məni TASS agentliyindəki işimdən azad etdilər. Bütün bu hadisələr ötən ili mənim üçün həqiqətən yadda qalan etdi.

AZƏRTAC xəbər verir ki, bu fikirləri “Hakimiyyət formulu və digərləri haqqında” adlı yaradıcılıq gecəsində beynəlxalq səviyyədə tanınmış jurnalist, “Hakimiyyət formulu” televiziya layihəsinin müəllifi və aparıcısı Mixail Qusman deyib. Tədbir onun yaxınları və dostlarının iştirakı ilə keçib.

Mixail Qusman qonaqlarla onilliklər ərzində toplanmış əvəzsiz təcrübəni və parlaq xatirələrini bölüşüb. Onun müəllifi olduğu “Hakimiyyət formulu” proqramı diqqət mərkəzində olub, proqramın coğrafiyası demək olar ki, bütün planetı əhatə edib. Müəllif dünya liderləri və yüksək vəzifəli şəxslərlə keçirilmiş unikal müsahibələrdən bəhs edib, ənənəvi olaraq ictimaiyyətdən yayınanları belə danışdırmağı bacardığını vurğulayıb.

“Ötən ilin payızında “Hakimiyyət formulu” proqramının 25 illiyini qeyd etməyi planlaşdırırdım. Bu proqram vasitəsilə dahi Heydər Əliyevlə müsahibəm ömrüm boyu unudulmaz bir xatirə olaraq qalacaq. Bundan başqa, Prezident İlham Əliyevlə üç, vitse-prezident Mehriban Əliyeva ilə iki müsahibəm olub. “Hakimiyyət formulu” proqramının tarixi məhz belə müsahibələrlə zəngin olub”, – deyə Qusman bildirib.

Onun sözlərinə görə, Ümummilli Lider Heydər Əliyev ona ikinci müsahibə vəd etmişdi: “Həmin müsahibə o günün ikinci yarısına təyin olunmuşdu – Hərbi məktəbin kursantları qarşısında çıxışı zamanı özünü pis hiss etdiyi məhz həmin gün. Mən artıq Bakıda idim, yayımı izləyirdim və bugünə qədər söhbətimizi tamamlaya bilmədiyimiz üçün ağrı hiss edirəm. O zaman özü belə dedi: “Biz səninlə hələ görüşəcəyik”.

44 günlük Vətən müharibəsi hadisələrini xatırlayan jurnalist deyib: “Biz döyüşürdük – hərə öz cəbhəsində. Mənim üçün bu 44 gün həqiqət anı oldu. Bu müharibənin əsas nəticəsi təkcə geri qaytarılmış torpaqlar deyil, həm də ədalət hissinin bərpasıdır. 30 il ərzində bizə yuxarıdan aşağı baxaraq “öyrəşməyi” və “keçmişlə yaşamamağı” məsləhət görürdülər. Amma mən heç vaxt Vətənin sülh yolu ilə qaytarılacağına inanmırdım. Ali Baş Komandan hücum əmri verəndə bu, ən yüksək xoşbəxtlik anı oldu. Biz sübut etdik ki, xalqın ləyaqətini əbədi tapdalamaq olmaz”.

Görüşün davamında Mixail Qusman auditoriyanın suallarını cavablandırıb.