İyulun 28-də Bakıda Auditorlar Palatası ilə İsrailin Sertifikatlaşdırılmış İctimai Mühasiblər İnstitutu arasında anlaşma memorandumu imzalanacaq.

AZƏRTAC xəbər verir ki, bununla bağlı keçirilən tədbirdə Auditorlar Palatasının sədri Vahid Novruz ölkələrimiz arasında əlaqələrin inkişafından danışıb. Qeyd edib ki, Azərbaycan Respublikasının Auditorlar Palatası ölkə Prezidenti İlham Əliyevin göstərişlərini rəhbər tutaraq, müstəqil maliyyə nəzarəti sahəsində mütərəqqi dünya təcrübəsini öyrənmək və milli iqtisadiyyatın xüsusiyyətlərini nəzərə almaqla ölkəmizdə tətbiqini genişləndirmək məqsədilə bir sıra xarici ölkələrin audit və mühasibatlıq qurumları ilə əməkdaşlıq sazişləri imzalayıb. Bu sazişlərin reallaşması ölkədə auditin inkişafı sahəsində xarici tərəfdaşlarla birgə tədbirlər həyata keçirmək və təcrübə mübadiləsi aparmaq üçün önəmli əhəmiyyət kəsb edir və bu ənənə bu gün də uğurla davam etdirilir. Əminəm ki, imzalanacaq bu saziş hər iki ölkənin auditorları və mühasibləri üçün uğurlu əməkdaşlığa, birgə fəaliyyətə və bütövlükdə audit peşəsinin inkişafına mühüm töhfə verəcək.

O qeyd edib ki, 1931-ci ildə yaradılmış, BMF-nın qurucularından biri olan və 1977-ci ildən həmin beynəlxalq qurumun üzvü olan İsrailin Sertifikatlaşdırılmış İctimai Mühasiblər İnstitutu peşəkar milli qurum olaraq İsrailin bütün ərazisində mühasibatlıq və audit peşələrinin inkişafında həlledici rol oynayır.

"Əminəm ki, Auditorlar Palatası bundan sonra da özünün səmərəli fəaliyyəti ilə ölkəmizdə müstəqil auditin inkişaf və tərəqqisinə, şəffaflığın təmin edilməsinə və daha da artırılmasına öz töhfəsini verəcək. Çox xoşdur ki, Azərbaycanın indiyə kimi qazandığı iqtisadi uğurlar və hazırda həyata keçirdiyimiz islahatlar dünyanın nüfuzlu maliyyə qurumları tərəfindən lazımınca qiymətləndirilir. Bu gün Azərbaycan ictimai-siyasi cəhətdən sabit, iqtisadi gücü sürətlə artan və irimiqyaslı layihələr icra edən ölkədir. Bu sahədə daha böyük uğurlara imza atmaq üçün idarəetmə sisteminin ən mühüm alətlərindən olan hesabatlılıq və şəffaflığın gücləndirilməsinin böyük əhəmiyyəti vardır ki, bunlar da öz növbəsində təkmil uçot, mühasibatlıq və auditin olmasını zəruri edir.

Son dövrlərdə Azərbaycanda qəbul edilmiş dövlət sənədlərində və Milli Fəaliyyət Proqramlarında şəffaflığın artırılması problemi dövlət orqanlarının fəaliyyətində olduğu kimi, müstəqil auditin tətbiq sahəsi olan özəl sektorda da təmin edilməsi məsələsi qarşıya məqsəd qoyulub. Eyni zamanda auditorların və mühasiblərin məsuliyyətinin artırılması günün vacib məsələlərindəndir", - deyə V.Novruzov diqqətə çatdırıb.

Sədr deyib: "Şəffaflıq və nəzarət sahəsində ölkəmizdə bir sıra aktual problemlər öz konseptual həllini gözləyir. Ümidvaram ki, əməkdaşlığımız iqtisadi inkişafın müasir mərhələsində şəffaflığın təmin edilməsində və hesabatlılığın yüksək səviyyədə qurulmasında, kölgə iqtisadiyyatının aradan qaldırılmasında, dövlət və qeyri-dövlət nəzarətinin, o cümlədən müstəqil auditin rolunun getdikcə artırılmasına, bu sahədə mövcud olan problemlərin və qarşıda duran vəzifələrin yerinə yetirilməsinə geniş imkanlar yaradacaq. Bu sahədə İsrailin böyük nailiyyətlərindən bizim xəbərimiz var və biz ölkə iqtisadiyyatında şəffaflığı artırmaq üçün bu müsbət təcrübədən istifadə etmək və qeyri-dövlət maliyyə nəzarətinin səviyyəsini yüksəltmək, rəqəmsallaşmanı geniş tətbiq etmək istəyirik. Ümidvaram ki, israilli həmkarlarımız da auditin innovativ inkişafı, kölgə iqtisadiyyatına qarşı mübarizə və auditdə rəqəmsallaşmanın tətbiqi sahəsində bizim əldə etdiyimiz nəticələrdən bəhrələnə biləcəklər".