Parlamentdə “Sosial sığorta haqqında” Azərbaycan Respublikasının Qanununda dəyişiklik edilməsi barədə qanun layihəsi birinci oxunuşda təsdiq edilib.

AZƏRTAC xəbər verir ki, qanun layihəsi Milli Məclisin noyabrın 18-də keçirilən plenar iclasının gündəliyinə daxil edilib.

Qanuna təklif edilən dəyişikliklər işğaldan azad edilmiş ərazilərdə qeyri-dövlət və qeyri-neft-qaz sektorunda çalışan sığorta edənlərin və sığorta olunanların əməyinin stimullaşdırılması məqsədi daşıyır. Qanunun 1-ci maddəsinə “Məcburi Dövlət Sosial Sığorta haqlarının subsidiyalaşdırılması” anlayışı əlavə olunur və qanuna yeni 14-1. Azərbaycan Respublikasının işğaldan azad edilmiş ərazilərdə Məcburi Dövlət Sosial Sığorta haqlarının subsidiyalaşdırılması maddəsi daxil edilir.

Təklif edilən dəyişikliyə görə işğaldan azad edilmiş ərazilərdə fəaliyyət göstərən sığorta edənlərin ödədikləri Məcburi Dövlət Sosial Sığorta haqları tam və ya qismən dövlət büdcəsi hesabına subsidiyalaşdırılır.

Sosial Sığorta haqlarının subsidiyalaşdırılması 2023-2026-cı illərdə 100 faiz, 2026-2029-cu illərdə 80 faiz, 2029-cu ildən 2031-ci ilədək 60 faiz, 2031-ci ildən 2033-cü ilədək 40 faiz miqdarında təmin ediləcəkdir.

Qanundakı digər dəyişikliyə görə işğaldan azad olunmuş ərazilərdə fərdi qaydada (muzdlu işçi cəlb etmədən) bir sıra peşələrdə fəaliyyət göstərən fiziki işçilərin, o cümlədən baytarlıq praktikası ilə məşğul olan şəxslərin ödədikləri sosial sığorta haqlarının 100 faizi dövlət büdcəsi vəsaiti hesabına subsidiyalaşdırılır.