İnnovasiya və Rəqəmsal İnkişaf Agentliyinin (İRİA) təşəbbüsü ilə Avropanın qabaqcıl şirkətlərindən olan Estoniyanın “Digital Nation” şirkəti ilə birgə əməkdaşlıq çərçivəsində “Rəqəmsal Transformasiya üzrə Rəhbər” adlı təlim proqramına start verilib.
×
İnnovasiya və Rəqəmsal İnkişaf Agentliyinin (İRİA) təşəbbüsü ilə Avropanın qabaqcıl şirkətlərindən olan Estoniyanın “Digital Nation” şirkəti ilə birgə əməkdaşlıq çərçivəsində “Rəqəmsal Transformasiya üzrə Rəhbər” adlı təlim proqramına start verilib.
AZƏRTAC xəbər verir ki, dördgünlük sessiyalardan ibarət proqram rəqəmsal hökumət istiqamətində vörkşoplar, layihələr üzərində komanda işi, beynəlxalq təcrübənin öyrənilməsi və xarici ekspertlərlə əlaqə imkanlarını özündə birləşdirir. Proqramda dövlət orqanlarının (qurumlarının) 40-dan çox rəhbər nümayəndələri iştirak edir. Rəqəmsal hökumət sahəsində Avropanın qabaqcıl ekspertləri tərəfindən proqram iştirakçılarına rəqəmsal transformasiya sahəsində praktiki alətlər və effektiv metodlar öyrədilir. Təlimlər nəticəsində rəhbər şəxslərdən ibarət qruplar rəqəmsal transformasiya sahəsində liderlik bacarıqları və bütün dövlət xidmətləri və rəqəmsal həllərinin tətbiqi üzrə geniş təsəvvür əldə edəcəklər. Hər bir dövlət orqanının (qurumun) nümayəndələri üçün məsul olduqları sahələrdə rəqəmsal transformasiya proseslərinə rəhbərlik etmək üçün fərdi inkişaf planları yaradılıb.
Tədbirdə çıxış edən İnnovasiya və Rəqəmsal İnkişaf Agentliyinin Rəqəmsal Akademiya üzrə rəhbəri Aleksey Qusev rəqəmsal transformasiyanın önəmindən və proqramın missiyasından bəhs edib.
Estoniya hökumətinin üzvü Siim Sikkut qeyd edib ki, Azərbaycan rəqəmsal sahənin inkişafı üçün əvvəlcə ölkə cəmiyyətinə lazım olanlar tətbiq edilməlidir. Rəqəmsal xidmət proseslərinə diqqət edilməlidir. Transformasiya elə yaradılmalıdır ki, insanlar bundan rahat şəkildə istifadə etsinlər. Estoniya təcrübəsindən bəhs edən Siim Sikkut əlavə edib ki, insanlar rəqəmsal platformalardan heç bir çətinliklə üzləşmədən istifadə edirlər.
Estoniyanın digər hökumət üzvü Taavi Linnamae bildirib ki, rəqəmsal xidmətlərin genişləndirilməsi üçün texnoloji tərəflə yanaşı idarəetmə də gücləndirilməlidir. Yəni rəqəmsal sahələrdə çalışacaq menecerlər yetişdirilməlidir. Onun sözlərinə görə, Azərbaycanda rəqəmsal sahədə kifayət qədər inkişaf edib: “Ancaq bu sahənin xeyli sayda bölmələri var. Bu bölmələrdə fəaliyyəti gücləndirmək üçün mütəxəssislərin olmasına ehtiyac var”.
Qeyd edək ki, bu gündən proqram çərçivəsində "Rəqəmsal Azərbaycan: Reallaşdırılması üçün vacib addımlar və strategiyalar” mövzusunda açıq müzakirə keçirilib. Müzakirələr Rəqəmsal Estoniyanın qurucuları və ölkənin rəqəmsallaşmasında uğur hekayəsi yazmış 2 hökumət üzvü Siim Sikkut və Taavi Linnamae ilə baş tutub.
Əlavə edək ki, “Rəqəmsal Transformasiya üzrə Rəhbər” proqramının keçirilməsində əsas məqsəd dövlət sektorunda dayanıqlı rəqəmsal transformasiya üzrə təcrübəni inkişaf etdirmək, bu sahədə liderlər qrupunun formalaşdırılmasına təkan vermək və qabaqcıl dünya təcrübəsini əlçatan etməkdir.