İkiillik Şəffaflıq Hesabatları (BTR) Milli Səviyyədə Müəyyən Edilmiş Töhfələrə (NDC) doğru irəliləyişləri sənədləşdirməyə və göstərilən səyləri nümayiş etdirməyə imkan verir. Bu hesabatlar Paris Sazişinin həyata keçirilməsində qlobal etimadın artırılması üçün vacibdir. Hesabatları hazırlamaq həmişə asan olmur, xüsusilə inkişaf edən ölkələr üçün.

AZƏRTAC xəbər verir ki, bunu ekologiya və təbii sərvətlər nazirinin müavini Umayra Tağıyeva COP29 çərçivəsində keçirilən "Avrasiya, Asiya və Qafqazda İkiillik Şəffaflıq Hesabatlarının hazırlanması üzrə ən yaxşı təcrübələr” mövzusunda tədbirdə deyib.

Azərbaycanın ilk BTR hesabatını tamamladığını vurğulayan U.Tağıyeva göstərilən texniki dəstəyə görə tərəfdaşlara təşəkkür edib.

“Bir-birimizdən öyrənməklə, qarşılıqlı etimad və hesabatlılıq üçün daha möhkəm təməl atırıq ki, bu da qlobal iqlim idarəçiliyinin uğuru baxımından vacibdir. Bu ilin sonuna qədər ilk BTR-lər təqdim edilməlidir. Buna görə də məlumat və təcrübə mübadiləsi bu mühüm tapşırıqda ölkələrin etimad və imkanlarını artırmaq üçün kritik olacaq. Mənə xoşdur ki, bu tədbirdə texniki çətinliklər vurğulanacaq və bu işin dəstəklənməsi üçün praktik tövsiyələr veriləcək. Çətinliklər çoxdur, amma əməkdaşlıq və bilik mübadiləsi üçün imkanlar daha böyükdür".

Qeyd edək ki, tədbirin məqsədi iştirakçıların müvafiq sahədə biliklərini artırmaq, etimad mühitinin yaradılmasına nail olmaqla həmin ölkələri bu il dekabrın 31-dək ilk BTR hesabatlarını tamamlamağa təşviq etməkdir.

Tədbirdə BTR hesabatlarını yekunlaşdıraraq UNFCCC Katibliyinə təqdim etmiş ölkələrin nümayəndələri tərəfindən ən yaxşı təcrübələr, uğur hekayələri haqqında təqdimatlar dinlənilib, texniki çətinliklərin həlli, praktik yollar və mümkün çeviklik barədə sual-cavab sessiyası təşkil olunub.