İyulun 27-də İslam Dünyası Təhsil, Elm və Mədəniyyət Təşkilatı (ICESCO) “Su təhlükəsizliyinin İslam dünyasında sülh və inkişafın təmin edilməsində rolu” mövzusunda virtual forum keçirib.

AZƏRTAC xəbər verir ki, bu tədbirin keçirilməsi gələn il Seneqalda təşkil ediləcək Dünya Su Forumuna hazırlıq məqsədi daşıyıb. ICESCO-nun Baş direktoru Salim Əl-Malik çıxışında qeyd edib ki, iqlim dəyişmələri və quraqlığın artdığı bir dövrdə su ehtiyatlarından səmərəli istifadə, kanalizasiya sistemləri və gigiyena xidmətlərinin düzgün idarə edilməsi mühüm vəzifə kimi qarşıya çıxıb. O əlavə edib ki, su təhlükəsizliyi bəşəriyyətin gələcəyi, habelə sosial-iqtisadi inkişaf, enerji və qida təminatı baxımından həyati əhəmiyyətə malikdir.

Foruma sədrlik edən Qvineyanın sabiq Baş Naziri Kabine Komara, Dünya Su Şurasının prezidenti Loik Foçon, Seneqalın Su və Sanitariya naziri Serigne Ziyam, ekspertlər və beynəlxalq təşkilatların nümayəndələri qeyd ediblər ki, hər il dünyada 300 mindən çox beş yaşına qədər uşaq içməli su çatışmazlığı və gigiyena şəraitinin olmaması səbəbindən həyatını itirir. Bundan başqa, insanların 2 milyarda yaxını içməli su çatışmazlığı, 4 milyarddan çoxu isə kanalizasiya sisteminin bərbad olması problemləri ilə üz-üzədirlər. Zəruri sanitar-epidemioloji şəraitin olmaması səbəbindən 44 milyon hamilə qadın infeksion xəstəliklərə yoluxub.

Tədbirdə İslam ölkələrində su təhlükəsizliyi ilə əlaqədar vəziyyət müzakirə olunub, su ehtiyatları, onlardan səmərəli istifadə və bu sahədə əməkdaşlığa dair hesabatlar təqdim edilib.

Forum çərçivəsində ICESCO və Dakar Dünya Su Forumunun baş katibliyi arasında əməkdaşlığa dair sənəd də imzalanıb.

Oqtay Bayramov

AZƏRTAC-ın xüsusi müxbiri

Qahirə