Himayədar ailə modelinin hazırlanmasında Türkiyə, Xorvatiya, Bolqarıstan, Çexiya və Rumıniya təcrübəsi öyrənilib, faydalanılıb. Himayədar valideyn olmaq üçün vətəndaş yetkinlik yaşına çatmalıdır. Onlar hər iki cinsdən ola bilərlər, evli və ya subay, ən azı ümumi orta təhsilli olmalıdırlar. Ailədə adam başına düşən orta aylıq gəlir ailə üzvlərinin hər biri üçün ölkə üzrə müəyyən edilmiş yaşayış minimumdan az olmamalıdır. Qanunvericilikdə müəyyən edilmiş ağır və ya xüsusi ağır cinayətlərə görə məhkumluğu olmamalıdır, sağlamlıq vəziyyəti normal olmalıdır, ölkə ərazisində daimi yaşayan Azərbaycan vətəndaşı olmalıdır.

AZƏRTAC xəbər verir ki, bu sözləri Milli Məclisin Əmək və sosial siyasət komitəsinin mayın 3-də keçirilən iclasında əmək və əhalinin sosial müdafiəsi nazirinin müavini Vüsal Nəsirli deyib.

“Burada əsas məqamlardan biri, himayədar ailə üçün nikahda olan qadınların aşağı yaş həddi 25, nikahda olmayanlar üçün isə 30 yaş müəyyən edilib. Minimum yaş həddinin qoyulması uşaqlara daha yaxşı xidmətin göstərilməsi üçün təcrübə tələbi ilə bağlıdır. Digər bir məqam isə himayədar valideyn olmaq istəyən nikahda olmayan şəxslə himayəyə verilən uşağın yaş fərqi 18-dən az olmamalıdır. Bu sırf etik normalar nöqteyi-nəzərindən tətbiq edilib”, - deyə nazir müavini vurğulayıb.