Hər bir rayonda sığınacaq, uşaq və ailələrə dəstək mərkəzlərinin sayının artırılmasına ehtiyac var.

AZƏRTAC xəbər verir ki, bunu Milli Məclisin İctimai birliklər və dini qurumlar, Elm və təhsil, Ailə, qadın və uşaq məsələləri, Səhiyyə və Mədəniyyət komitələrinin birgə iclasında Ailə, qadın və uşaq məsələləri komitəsinin iclasında komitə sədri Hicran Hüseynova deyib.

“Biz hər zaman məişət zorakılığına, insan alverinə, erkən nikaha məruz qalmış şəxslər, küçə uşaqları, sağlamlıq imkanları məhdud və xüsusi qayğıya ehtiyacı olan uşaqlar, onların ailələri ilə sosial, psixoloji və psixo-pedaqoji işin təşkili məsələsini önə çəkirik. Müxtəlif dövlət qurumlarının tabeliyində sosial xidmət müəssisələri, Bakı şəhəri və 12 rayon üzrə uşaqların dövlət uşaq müəssisələrinə düşməsinin qarşısının alınması və çətin həyat şəraitində olan uşaqların və ailələrin sosial xidmətlərə çıxışının təmin edilməsi məqsədilə günərzi mərkəzləri, 11 Uşaq və Ailələrə Dəstək mərkəzi, eyni zamanda, zorakılığa məruz qalan şəxslər üçün dövlət sığınacağı və akkreditasiya edilmiş qeyri-dövlət yardım mərkəzi var. Onların sayı ildən-ilə artır. Lakin hər bir rayonda bu mərkəzlərə ehtiyac var. Bu, həm qadınlar, həm uşaqlar, həm də kişilər üçün həmin xidmətlərin daha əlçatan olması, xidmətlərin daha tez və vaxtında göstərilməsi baxımından vacibdir”, - deyə komitə sədri bildirib