“Psixi sağlamlıq xidmətlərinin münaqişədən sonrakı dövrdə koordinasiyası və transformasiyası” layihəsi ilkin səhiyyə xidmətinin inteqrasiyası deməkdir. Layihə çərçivəsində mühüm nailiyyətlər əldə olunub.

AZƏRTAC xəbər verir ki, bunu layihənin bağlanış tədbirində Ümumdünya Səhiyyə Təşkilatının (ÜST) Azərbaycandakı nümayəndəsi Hande Harmancı deyib. O qeyd edib ki, 20 psixiatr və ilkin səhiyyə həkimindən ibarət milli təlimçi komandası yaradılıb. Hədəf rayonlarda 11 təlim və davamlı superviziyalar təşkil olunaraq 170-dən çox ilkin səhiyyə həkiminin psixi sağlamlıqla bağlı bilik və bacarıqları artırılıb. Eyni zamanda, psixi sağlamlıq və psixo-sosial dəstək ilə bağlı 6 maarifləndirmə kampaniyası təşkil olunub və bu kampaniyalar çərçivəsində 5 minə yaxın vətəndaşa xidmət göstərilib.