Bu gün 20 konteynerdən ibarət qatar Gürcüstana yola salınıb.

Bunu AZƏRTAC-a açıqlamasında Azərbaycan Dəmir Yollarının (ADY) Yük daşımaları departamentinin rəhbəri Emil Əhmədov bildirib.

O qeyd edib ki, Orta Dəhlizin vacib seqmenti hesab olunan Bakı-Tbilisi-Qars dəmir yolu xəttinin Gürcüstan hissəsində 184 kilometrlik hissəsində aparılmış təmir-bərpa, rekonstruksiya və genişləndirmə işləri artıq yekunlaşıb. Bu gündən etibarən BTQ dəmir yolu xətti üzrə yükdaşımalara start verilir.

“Azərbaycan və Gürcüstan hökumətləri arasında imzalanmış müvafiq sənədə əsasən Bakı-Tbilisi-Qars dəmir yolunun idarə olunması məqsədilə birgə müəssisə yaradılmaq üzrədir. Hazırda beynəlxalq məsləhətçi şirkətlə birgə müəssisənin biznes modelinin hazırlanması istiqamətində işlər görülür. Məqsəd yük həcminin artırılması, BTQ xəttinin inkişaf etdirilməsidir”, - deyə E.Əhmədov qeyd edib.

Onun sözlərinə görə, birgə müəssisənin əsas işi layihə ilə bağlı bütün işlərin həyata keçirilməsi, yükdaşınması üzrə tariflərin müəyyən olunması, yüklərin daşınması və bütövlükdə əməliyyat məsələlərinin həll olunmasından ibarətdir.

Department rəhbəri əlavə edib ki, ADY mütəmadi olaraq Mərkəzi Asiya və Avropa ölkələri arasında yükdaşımanın Orta Dəhliz vasitəsi ilə icra edilməsi üçün sahibkarlarla yerində görüşlər təşkil edir, qeyd olunan ölkələrin dəmiryolu administrasiyaları və daşıyıcı şirkətləri ilə sıx əməkdaşlıq qurur. Eyni zamanda, Avropa ölkələrindən Mərkəzi Asiya istiqamətinə daşınan yüklərin Orta Dəhliz vasitəsilə daşnması üçün Avropada olan yük operatorları ilə sıx əlaqə qurulur.

“Son illərdə dəmir yolu ilə tranzit yükdaşımalarda əhəmiyyətli artım qeydə alınıb. Misal üçün, 2019-cu ildə 3,8 milyon ton tranzit yükü daşınmışdısa, 2023-cü ildə bu rəqəm 6,8 milyon tona çatıb. Ötən ilin ilk dörd ayı ilə müqayisədə bu ilin yanvar-aprel aylarında daşınan tranzit yüklərin həcmi 14 faiz artıb. BTQ-nin də tərkib hissəsi olduğu Şərq-Qərb dəhlizi üzrə bu ilin birinci rübündə 10 faiz daha çox tranzit yükü daşımışıq”, - deyə o vurğulayıb.