Aprelin 19-da Azərbaycan Memarlar İttifaqı görkəmli memarlar Sadıq Dadaşovun və Mikayıl Useynovun anadan olmalarının 120 illiyinə həsr olunmuş tədbir keçirib.

AZƏRTAC xəbər verir ki, əvvəlcə Azərbaycan Memarlar İttifaqının İdarə Heyəti üzvləri, həmçinin mədəniyyət nazirinin müavini Murad Hüseynov, Azərbaycan Respublikasının Dövlət Şəhərsalma və Arxitektura Komitəsi sədrinin müavini İlqar İsbatov, “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud, Bakı Şəhər İcra Hakimiyyəti başçısının müşaviri Kamil Məmmədov və digər dövlət qurumlarının rəsmi şəxsləri Fəxri xiyabana gələrək hər iki görkəmli memarın xatirələrinə böyük ehtiram əlaməti olaraq onların məzarları önünə əklillər və gül dəstələri qoyublar.

Sonra Azərbaycan Respublikası Memarlar İttifaqının dəstəyi və “Gənc memarlar və tələbələr klubu”nun təşkilatçılığı ilə elan olunmuş “Gənc memarların və tələbələrin işlərindən ibarət IX Respublika müsabiqəsi”nə təqdim edilmiş layihələrin İçərişəhərdə yerləşən “Zaman ART Gallery”də sərgisi açılıb və qaliblərin təntənəli mükafatlandırılma mərasimi keçirilib.

Tədbirdə Azərbaycan Memarlar İttifaqının İdarə Heyətinin sədri Elbay Qasimzadə, mədəniyyət nazirinin müavini Murad Hüseynov, Azərbaycan Respublikasının Dövlət Şəhərsalma və Arxitektura Komitəsi sədrinin müavini İlqar İsbatov, “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud, Bakı Şəhər İcra Hakimiyyəti başçısının müşaviri Kamil Məmmədov müsabiqənin keçirilməsinin gənc memarların inkişafında böyük əhəmiyyətə malik olduğunu qeyd edərək onları qazandıqları uğur münasibətilə təbrik edib və gələcək fəaliyyətlərində uğurlar arzulayıblar.

Azərbaycan Memarlar İttifaqının Beynəlxalq əlaqələr və Gənclərlə iş komissiyaları üzrə katibi Şeyda Novruzzadə gənc memarların yaradıcılığına güclü stimul verən belə mühüm tədbirlərin təşkilində göstərilən dəstəyə görə Memarlar İttifaqının rəhbərliyinə minnətdarlığını bildirib.

“Gənc memarlar və tələbələr klubu”nun prezidenti Elin Bəylərov 2014-cü ildən gənc memarların və tələbələrin işlərindən ibarət müsabiqələrin uğurla keçirildiyini və artıq 9-cu müsabiqənin baş tutduğunu diqqətə çatdırıb. O, tədbirdə iştirak edən müsabiqə iştirakçılarına öz gələcək fəaliyyətlərində uğurlar diləyib.

Qeyd olunub ki, bu il müsabiqəyə ümumilikdə 36 iş daxil olub və aprelin 27-də münsiflər heyəti layihələrə baxaraq, qalibləri müəyyən ediblər. Münsiflər heyətinin tərkibinə müxtəlif illərdə “Gənc memarların və tələbələrin işlərindən ibarət Respublika müsabiqəsi”nin qalibi olmuş gənc memarlar daxil edilib.

Münsiflər heyətinin qərarı ilə müsabiqədə "Peyk inteqrasiyası və test mərkəzi" layihəsinə görə Cavid Cabbarov birinci yerə, "Bakı şəhərinin Bibiheybət qəsəbəsində üzən platformada milli mətbəx layihəsi"nə görə Məlik Quliyev ikinci yerə, “Türkiyə Cümhuriyyət Universiteti texniki kampus” layihəsinə görə Osman Qocayev üçüncü yerə layiq görülüb. Onlar fəxri diplom və pul mükafatı ilə təltif ediliblər. Bundan əlavə, " Ağdam şəhərində incəsənət mərkəzi" layihəsinə görə Emiliya Şuqayeva münsiflər heyətinin xüsusi diplomuna layiq görülüb.

Müsabiqədə fərqlənən işlər Mədəniyyət Nazirliyinin, Dövlət Şəhərsalma və Arxitektura Komitəsinin, “İçərişəhər” Dövlət Tarix-Memarlıq Qoruğu İdarəsinin, Bakı Şəhər İcra Hakimiyyətinin və müxtəlif memarlıq şirkətlərinin fəxri diplomları və mükafatları ilə təltif ediliblər.

Müsabiqənin bütün iştirakçılarına Azərbaycan Memarlar İttifaqının sertifikatı təqdim olunub.