Fövqəladə Hallar Nazirliyinin (FHN) İdman-sağlamlıq klubunun təşkilatçılığı ilə nazirliyin qurumları arasında şahmat turnirinin final görüşləri keçirilib.
×
Fövqəladə Hallar Nazirliyinin (FHN) İdman-sağlamlıq klubunun təşkilatçılığı ilə nazirliyin qurumları arasında şahmat turnirinin final görüşləri keçirilib.
AZƏRTAC xəbər verir ki, yarışda 20 komandanın ümumilikdə 70 əməkdaşı iştirak edib. Çempionatın baş hakimi Fikrət Sideifzadə olub.
Beş gün davam edən turnirdə Tikintidə Təhlükəsizliyə Nəzarət Dövlət Agentliyi komandası bütün rəqiblərinə qalib gələrək birinci olub. İkinci yerə Mülkü müdafiə qoşunları, üçüncü yerə isə Sənayedə İşlərin Təhlükəsiz Görülməsi və Dağ Mədən Nəzarət Dövlət Agentliyi komandaları layiq görülüblər.
Şəxsi yarışlarda çempion adını Fövqəladə Hallar Nazirliyinin Akademiyasının əməkdaşı Cəbrayıl Hüseynli qazanıb. İkinci yeri Böhran Vəziyyətlərinin İdarəetmə Mərkəzindən Səid Adıgözəlov, üçüncü yeri isə Dövlət Yanğından Mühafizə Xidmətindən Cavid İsgəndərli tutub.
Sonda qaliblər kubok, diplom, medalla təltif olunublar. Ardınca isə Azərbaycan Respublikasının Dövlət Himni səsləndirilib.
Mükafatlandırma mərasimindən sonra çempionluq təəssüratlarını jurnalistlərlə bölüşən Tikintidə Təhlükəsizliyə Nəzarət Dövlət Agentliyi komandasının kapitanı Elçin Əsədov turnirin gərgin və maraqlı keçdiyini bildirib: “Qalib gəldiyimiz üçün xoşbəxtəm. Bütün komandaların heyətində əhval-ruhiyyə yüksək idi. İdeal şəraitdə mübarizə apardıq”.
Fövqəladə Hallar Nazirliyinin İdman-sağlamlıq klubunun rəisi polkovnik Füzuli Musayev əməkdaşların yarışda yüksək səviyyədə çıxış etdiklərini vurğulayıb: “Onların bu cür mübarizəsi bizi sevindirir. Gələcəkdə Azərbaycan çempionatında iştirak etmək istəyirik".
O, FHN əməkdaşları arasında daha doqquz yarışın keçiriləcəyini söyləyib: "Daha çox fiziki idman növlərinə üstünlük verəcəyik. Bilirsiniz ki, bizim işimiz insanların sağlamlığına diqqət yetirməkdir. Bununla yanaşı, əyləncəli idman növləri - futbol, voleybol və minifutbol yarışları da təşkil olunacaq”.