Fövqəladə Hallar Nazirliyinin (FHN) və Elm və Təhsil Nazirliyinin birgə təşkilatçılığı ilə “Mülki müdafiə üzrə əhalinin hazırlanmasında ali təhsil müəssisələrinin rolu, mülki müdafiə fənninin tədrisinin təkmilləşdirilməsi, mülki müdafiənin maddi-tədris bazasının gücləndirilməsi, mövcud problemlərin müzakirəsi və bununla əlaqədar nazirliklər arasında qarşılıqlı fəaliyyət” mövzusunda elmi-praktik konfrans keçirilib.

AZƏRTAC xəbər verir ki, konfransda respublikanın ali təhsil müəssisələrinin mülki müdafiə sahəsinə məsul prorektorları, “Mülki müdafiə fənni” tədris olunan kafedra müdirləri, həmin kafedraların professor-müəllim heyəti, eləcə də, nazirliyin mülki müdafiə üzrə aidiyyəti məsul vəzifəli şəxsləri iştirak ediblər.

Tədbirin keçirilməsində əsas məqsəd mülki müdafiə üzrə əhalinin hazırlanmasında ali təhsil müəssisələrinin rolu, bu sahədə qarşıda duran vəzifələrin və onların həyata keçirilməsi yollarının müəyyənləşdirilməsi, ali təhsil müəssisələrində təhsil alan tələbələrin mülki müdafiə üzrə bilik səviyyələrinin yüksəldilməsi, “Mülki müdafiə fənni”nin tədrisinin təkmilləşdirilməsi, mülki müdafiənin maddi-tədris bazasının gücləndirilməsi və mövcud problemlərin aradan qaldırılması, eləcə də nazirliklər arasında qarşılıqlı fəaliyyətin gücləndirilməsi məqsədilə qarşılıqlı fikir mübadiləsinin aparılmasıdır.

Əvvəlcə, konfrans iştirakçıları mülki müdafiə sahəsində Fövqəladə Hallar Nazirliyinin fəaliyyəti barədə nazirlik tərəfindən hazırlanmış videoçarxı izləyiblər.

Sonra FHN-in Mülki müdafiə işinin təşkili Baş idarəsinin rəisi general-mayor Niyazi Zamanov çıxış edərək mülki müdafiə sahəsində görülən işlərin səmərəliliyinin artırılması məqsədilə mülki müdafiə sisteminin inkişafında elm və təhsilin rolundan bəhs edib. O, bu sahədə elmi tədqiqatların aparılması, innovativ və texnoloji yeniliklərin əldə olunmasının, “Mülki müdafiə fənni”ni tədris edən kadrların biliyinin təkmilləşdirilməsinin, onların ixtisaslarına uyğun, mülki müdafiə sahəsində praktiki təcrübələri nəzərə alınmaqla seçilməsinin, ali təhsil müəssisələrində digər kafedralarla yanaşı, mülki müdafiə kafedralarının açılmasının, “Mülki müdafiə fənni”nin tədrisi üzrə dərs vəsaitlərinin Azərbaycan, rus, həmçinin ingilis dili bölmələri üçün hazırlanmasının təşkilinin vacibliyindən danışıb.

Baş idarə rəisi “Mülki müdafiə fənni” üzrə tədris və tədris-metodiki vəsaitlərin, dərsliklərin, kitabların, o cümlədən elektron tədris vəsaitlərinin hər bir təhsil müəssisəsinin profilinə uyğun hazırlanmasının və bu sahədə mövcud qanunvericilik aktlarından istifadə edilməklə mülki müdafiə tədris sisteminin müasirləşdirilməsi və maddi-tədris bazasının müasir dövrün tələbləri səviyyəsində qurulmasının, təhsilin keyfiyyətinin yüksəldilməsi məqsədilə məlumat mübadiləsi və nazirliklər arasında qarşılıqlı fəaliyyətin gücləndirilməsinin zəruriliyini vurğulayıb. “Mülki müdafiə fənni”nin tədrisi ilə əlaqədar mütəmadi olaraq elmi-praktik konfransların, seminarların, mülki müdafiə məsələlərinə həsr edilmiş digər kütləvi tədbirlərin keçirilməsinin əhəmiyyətini vurğulayan N.Zamanov mülki müdafiənin tədrisi ilə bağlı açıq dərslərə digər tədris müəssisələrinin və FHN-in mütəxəssislərinin dəvət edilməsinin, ali təhsil müəssisələrinin və FHN Akademiyasının professor və müəllim heyəti ilə mülki müdafiə məsələlərinə həsr olunmuş görüşlərin keçirilməsinin və elmi-təcrübə mübadilələrinin aparılmasının, “Mülki müdafiə fənni”nin proqramlarına praktiki saatların daxil edilməsinin (mülki müdafiə işi nümunəvi təşkil olunan obyektlərdə praktiki dərslərin keçirilməsi) vacibliyini də tədbir iştirakçılarının diqqətinə çatdırıb.

Sonra elm və təhsil nazirinin müşaviri Nicat Məmmədli, AMEA-nın müxbir üzvü, Memarlıq və İnşaat Universitetinin fövqəladə hallar və həyat fəaliyyətinin təhlükəsizliyi kafedrasının müdiri İslam Mustafayev çıxış edərək mülki müdafiə fənninin tədrisinin təkmilləşdirilməsi, maddi-tədris bazasının gücləndirilməsi sahəsində qarşılıqlı fəaliyyətin əhəmiyyətini qeyd ediblər.

Daha sonra mövzu ətrafında geniş müzakirələr aparılıb