Azərbaycan qlobal və beynəlxalq problemlərin müzakirə edildiyi mühüm platformaya çevrilib. Paytaxtımız mütəmadi olaraq beynəlxalq tədbirlərə ev sahibliyi edir.
×
Azərbaycan qlobal və beynəlxalq problemlərin müzakirə edildiyi mühüm platformaya çevrilib. Paytaxtımız mütəmadi olaraq beynəlxalq tədbirlərə ev sahibliyi edir. Növbəti tədbir martın 15-16-da İslamofobiya ilə Beynəlxalq Mübarizə Gününə həsr olunacaq və “İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar” mövzusunda keçiriləcək.
AZƏRTAC xəbər verir ki, bu fikirləri Beynəlxalq Münasibətlərin Təhlili Mərkəzinin İdarə Heyətinin (BMTM) sədri Fərid Şəfiyev “İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar” mövzusunda Bakıda təşkil olunacaq beynəlxalq konfransla bağlı keçirilən brifinqdə söyləyib.
F.Şəfiyev qeyd edib ki, BMT-nin Baş Assambleyası ötən il martın 15-də “İslamofobiya ilə mübarizə günü” elan edilməsi haqqında qətnamə qəbul edib. Qətnamənin qəbul edilməsindən 1 il ötür və bu münasibətlə Azərbaycan bu mövzuda beynəlxalq elmi konfrans keçirir.
Diqqət çatdırılıb ki, bu tədbirdə islamofobiya, diskriminasiya və digər məsələlər elmi nöqteyi-nəzərdən müzakirə ediləcək. Xüsusilə Qərb dövlətlərinin İslam ölkələrinə qarşı yürütdüyü siyasət müzakirə olunacaq.
