Ölkə əhalisinin dayanıqlı və keyfiyyətli içməli su ilə təmin edilməsi məqsədilə 44 yeni su mənbəyi yaradılıb.

AZƏRTAC xəbər verir ki, bunu Azərbaycan Meliorasiya və Su Təsərrüfatı Açıq Səhmdar Cəmiyyətinin sədr müşaviri Əsəd Şirinov “Azərbaycanın su təsərrüfatı sektorunun inkişafı Ümummilli Lider Heydər Əliyevin adı ilə bağlıdır” mövzusunda elmi-praktik konfransda deyib.

O qeyd edib ki, ötən müddətdə Bakı şəhəri və ətraf qəsəbələrdə, həmçinin regionlarda içməli və tullantı su sistemlərinin yenidən qurulması istiqamətində mühüm layihələr həyata keçirilib. Əsası Ümummilli Lider Heydər Əliyev tərəfindən qoyulmuş, hazırda Prezident İlham Əliyevin rəhbərliyi ilə həyata keçirilən genişmiqyaslı islahatlar nəticəsində bütün sahələr kimi içməli su təsərrüfatı sektoru da yeni inkişaf dövrünə qədəm qoyub.

Onun sözlərinə görə, ötən müddətdə 53 şəhər və rayon mərkəzində içməli su və tullantı su layihələrinin icrasına başlanılıb, bunların 33-də həm içməli, həm də tullantı su şəbəkələrinin, 13-də isə içməli su şəbəkələrinin, 20-dən çox şəhərdə tullantı sutəmizləyici qurğuların tikintisi başa çatdırılıb. Eyni zamanda, 1100-dən çox kənd və qəsəbənin içməli su təchizatı əsaslı şəkildə yaxşılaşdırılıb.