Bakı Enerji Həftəsinin Şuşada keçirilən xüsusi sessiyası çərçivəsində Energetika Nazirliyi və BƏƏ-nin “Masdar” şirkəti arasında “Azərbaycan Respublikasında quruda sənaye miqyaslı 1 QVt gücündə günəş və 1 QVt gücündə külək enerjisi layihələrinin qiymətləndirilməsi, inkişafı və həyata keçirilməsi ilə bağlı icra müqaviləsi” və “Dənizdə 2 QVt gücündə inteqrasiya edilmiş külək və yaşıl hidrogen layihələrinin qiymətləndirilməsi, inkişafı və həyata keçirilməsi ilə bağlı icra müqaviləsi” imzalanıb.

AZƏRTAC xəbər verir ki, quruda ümumi qoyuluş gücü 2 QVt olan külək-günəş enerjisi layihələri üzrə icra müqaviləsi çərçivəsində istehsal olunacaq enerjinin müəyyən bir qisminin ölkənin enerji sisteminə ötürülməsi üçün şəbəkə imkanlarının müfəssəl araşdırılması, şəbəkənin gücləndirilməsi üzrə lazımi tədbirlərin görülməsi, həmçinin elektrik enerjisinin ixracı məqsədilə müvafiq proseslərin həyata keçirilməsi planlaşdırılır.

Dənizdə qoyuluş gücü 2 QVt olan külək və hidrogen enerjisi layihələri üzrə icra müqaviləsi isə istehsal və ixrac məqsədli külək elektrik enerjisi güclərinin yaradılmasını, karbonsuzlaşdırma, hidrogenin istehsalı və ixracı istiqamətində kompleks tədbirlərin görülməsini nəzərdə tutur.

Energetika naziri Pərviz Şahbazov deyib: “Bu gün Azərbaycan Prezidentinin bərpaolunan enerji mənbələrini ölkənin inkişafında strateji prioritet kimi müəyyənləşdirən “yaşıl enerji” kursuna uyğun olaraq “Masdar” şirkəti ilə meqa layihələrə imza atırıq. Bu 4000 MVt gücündə günəş, külək və “yaşıl hidrogen” layihələri regionda və energetika tariximizdə bərpaolunan enerji üzrə ən böyük istehsal gücləri olmaqla bərabər Azərbaycanın “yaşıl artım” ölkəsi, “yaşıl enerji”nin istehsalçısı və ixracatçısı kimi inkişafına geniş imkanlar, həmçinin çoxmilyardlı “yaşıl” investisiyanın cəlbinə fürsət yaradır. Bu layihələrin bir qisminin azad edilmiş ərazilərdə reallaşdırılması nəzərdə tutulur ki, bu da həmin bölgənin “sıfır emissiya”lı “yaşıl enerji” zonası konsepsiyasında inkişafına töhfə olacaq. Həmçinin dənizdə külək elektrik enerjisi güclərinin yaradılması və hidrogenin istehsal edilməsi ilə Xəzərin tarixində Azərbaycan vasitəsilə yeni səhifə açılır”.

Müqavilənin “Masdar” şirkəti ilə Azərbaycan arasında mövcud olan sıx münasibətləri daha da möhkəmləndirəcəyini və “təmiz enerji” sahəsində milli məqsədlərə nail olmağa əhəmiyyətli töhfə verəcəyini söyləyən şirkətin baş icraçı direktoru Mohamed Jameel Al Ramahi deyib: “Şirkətimizin bərpaolunan enerji mənbələri sahəsində bilik və təcrübəsi Azərbaycanda enerji keçidini dəstəkləyəcək, eyni zamanda dayanıqlı inkişafa, enerji təhlükəsizliyinin təminatına və zərərli tullantıların azaldılmasına dəstək verəcək. Biz Azərbaycanda tərəfdaşlarımızla bir çox layihələrin birgə reallaşdırılmasını səbirsizliklə gözləyirik”.

Qeyd edək ki, hazırda “Masdar” şirkəti ilə 220 milyon ABŞ dollarından çox investisiya hesabına 230 MVt gücündə Qaradağ GES-in inşası üzrə əməkdaşlıq edilir.

“Masdar” şirkəti 2030-cu ilə qədər balansında ümumilikdə 50 QVt, sonrakı illərdə isə 100 QVt-dan çox qoyuluş güclərinin olacağı gözlənilən dünyanın ən sürətlə inkişaf edən bərpaolunan enerji şirkətlərindən biridir.