Azərbaycanda aqrar sektorda həyata keçirilən kompleks tədbirlərin nəticəsi olaraq 2004-2020-ci illər ərzində kənd təsərrüfatında məhsul istehsalı 1,9 dəfə artıb, habelə 2020-ci ildə ölkənin qeyri-neft ixracında aqrar istehsal və emal məhsullarının payı 50 faiz təşkil edib.

AZƏRTAC xəbər verir ki, bu sözləri dekabrın 21-də Bakıda keçirilən Aqrobiznesin İnkişafı Forumunda iqtisadiyyat nazirinin müavini Elnur Əliyev bildirib.

Nazir müavini qeyd edib ki, pandemiya və post-pandemiya dövrü üçün hökumət tərəfindən qəbul olunmuş kompleks tədbirlər planı çərçivəsində iqtisadiyyatın və sahibkarların maliyyə resurslarına çıxış imkanlarının genişləndirilməsi və bu sahədə məqsədyönlü fəaliyyətin qurulması baxımından dövlətin bütün maliyyə və təşviq institutları və fondlarının fəaliyyətinin əlaqələndirilməsi məqsədilə Koordinasiya Şurasının yaradılması nəzərdə tutulub və aidiyyəti üzrə təkliflər hazırlanaraq hökumətə təqdim olunub.

Həmçinin aqrar sektorun inkişafında önəmli məsələlərdən hesab olunan torpaq münasibətlərinin tənzimlənməsində çevikliyin artırılması, torpaqların kateqoriyalara aid edilməsi və onların bir kateqoriyadan digərinə keçirilməsi, kateqoriya daxilində məqsədli təyinatın dəyişdirilməsi sahəsində prosedurların sadələşdirilməsi istiqamətində də aidiyyəti qurumlar tərəfindən zəruri tədbirlər həyata keçirilib, o cümlədən müvafiq hüquqi akt layihələri hazırlanaraq hökumətə təqdim edilib.

Nəzərə çatdırılıb ki, pandemiya və bundan irəli gələn məhdudiyyətlərin ölkə iqtisadiyyatına təsirlərinə baxmayaraq, həyata keçirilən kompleks tədbirlər nəticəsində cari ilin yanvar-noyabr aylarında ÜDM 5,3 faiz, o cümlədən kənd təsərrüfatında əlavə dəyər 3,8 faiz artıb.