Ələt Azad İqtisadi Zonasının yaradılmasının məqsədi buraya yüksək əlavə dəyərli ixracyönümlü məhsul istehsal edən investorları, müəssisələri cəlb etmək, burada onların fəaliyyətini təmin etməkdən ibarətdir. Təbii ki, bunu təmin etmək üçün müvafiq cəlbedici qanunvericilik olmalıdır. Ələt Azad İqtisadi Zonasına aid qanunvericilik ən dəqiq işlənmiş, investorların cəlb edilməsi üçün ən uğurlu qanunvericilik, normativ hüquqi baza hesab olunur. İkincisi, infrastrukturla təmin olunmuş ərazi lazımdır. Bu da yaradılıb. Birinci mərhələdə 60 hektar ərazidə torpaq işləri görülüb, yollar, su, qaz xətləri çəkilib, ofis binası, elektrik enerjisi ilə təmin etmək üçün 160 meqavatlıq yarımstansiya tikilib. Növbəti mərhələ üçün ərazilər hazırlayırıq. 138 hektar əlavə ərazidə hazırlıq işləri gedir ki, həmin ərazinin 41 hektarının sahibi var. Onlar xarici investorlardır. Orada böyük müəssisələr tikiləcək. Ona görə də həmin ərazidə işləri qısa müddətdə bitirməliyik.

AZƏRTAC xəbər verir ki, bunu Ələt Azad İqtisadi Zonasının Səlahiyyətli Qurumunun İdarə Heyətinin sədri Valeh Ələsgərov Ələt Azad İqtisadi Zonasında keçirilən yaşıllıqların götürülməsi, mühafizəsi və yeni yaşıllıq zolaqlarının salınmasına dair Dövlət Ekoloji Ekspertiza Agentliyi ilə birlikdə keçirilən ictimai dinləmədə deyib.

V.Ələsgərov investorlardan birinin iki-üç aydan sonra ən azı 85 min kvadratmetr ərazini əhatə edən müəssisənin tikintisinə başlamaq istədiyini qeyd edib: "Ona görə də biz ərazini hazırlamalıyıq. Ərazini hazırlamaq üçün orada köhnə Ağac Emalı Kombinatı sökülüb və təmizlik işləri gedir. Oradakı ağaclar da böyük ehtimal yarım əsr bundan əvvəl əkilib. Son 30 ildə isə həmin ağaclara qulluq edilməyib. Həmin ağacların vəziyyəti göz qarşısındadır. Ərazidə infrastruktur işləri ilə bərabər ən yüksək ekoloji tələblərə cavab verən işlər görüləcək. Təbii ki, götürüləcək ağacların yerinə yaşıllığın salınması da nəzərdə tutulub. Belə ki, 138 hektar ərazinin 10.5 hektar hissəsində yaşıllaşdırma, abadlaşdırma işləri zamanı 10 növdə 1513 ədəd ağac əkiləcək. Həmçinin ərazidə 15 növdə 39 min kol tipli gülün əkiləcəyi, geniş yaşıl örtüklü sahələr salınacağı nəzərdə tutulub. Tikiləcək müəssisədə tullantı sularının kanalizasiyaya axıdılmamasını şərt qoymuşuq. Bir tərəfdən müəssisənin fəaliyyətində, digər tərəfdən ekoloji məsələlərin nəzərə alınmasında maraqlıyıq. Ətraf mühit məsələlərinə çox diqqətlə yanaşırıq. Ən müasir texnologiyalardan istifadə edərək sıfır tullantı tətbiq ediləcək. Müəssisəyə gedən yollarda da Abşeron yarımadası üçün xarakterik bitkilərin əkilməsi nəzərdə tutulub".

V.Ələsgərov qeyd edib ki, ərazidəki müəssisəyə ən azı 230-250 milyon avro sərmayə qoyulacaq. Orada ən azı 350 nəfər işlə təmin olunacaq.