"Elektroenergetika haqqında" qanun layihəsi gələcəyə yönəlmiş bir sənəddir. Bu sənədin əsas məqsədi gələcəkdə Azərbaycanda energetika sahəsində dövlətin strateji nöqtələrini saxlamaqla, eyni zamanda, bir rəqabət mühiti yaratmaqdır.

AZƏRTAC xəbər verir ki, bu sözləri Milli Məclisin Təbii ehtiyatlar, energetika və ekologiya komitəsinin sədr müavini Asim Mollazadə komitənin martın 1-də keçirilən iclasında "Elektroenergetika haqqında" qanun layihəsinin müzakirəsi zamanı deyib.

O bildirib ki, qanun layihəsinin qəbulu nəticəsində şirkətlərin yeni texnologiyalardan istifadə edərək vətəndaşları elektrik enerjisi ilə təmin etmək seçimi olacaq. Bu sənədlə öz vətəndaşlarımızın imkanlarını genişləndiririk. Eyni zamanda, ölkəmizdə yeni hidroenergetik stansiyalar formalaşacaq

"Ölkəmizdə enerji sahəsində çox ciddi islahatlara başlanılıb. Dövlətimizin başçısının seçdiyi istiqamət üzrə Azərbaycan yaşıl energetika sahəsində bir sıra ölkələrlə, dünyanın tanınmış şirkətləri ilə əməkdaşlığa başlayıb", - deyə Asim Mollazadə qeyd edib.