Ölkəmizdə əhalinin sosial müdafiəsinin gücləndirilməsi, onların əmək hüquqlarının qorunması məqsədilə effektiv mexanizmlər müəyyən edilib. Regionda və dünyada baş verən böhranlara baxmayaraq əhalinin sosial vəziyyətinin yaxşılaşdırılması istiqamətində son 5 ildə aparılan islahatlar xüsusilə diqqət çəkir.

AZƏRTAC xəbər verir ki, bunu əmək və əhalinin sosial müdafiəsi nazirinin müavini Anar Əliyev Azərbaycan Həmkarlar İttifaqı Konfederasiyasının (AHİK) yaranmasının 30 illiyi münasibətilə fevralın 7-də keçirilən tədbirdə söyləyib.

Həssas qrupdan olan insanların problemlərinin diqqətdə saxlanıldığını deyən nazirliyin rəsmisi vətəndaşların sosial müdafiəsində DOST konsepsiyasının mühüm rolunu qeyd edib.

Rəqəmsallaşma sahəsində xeyli müsbət uğurların əldə edildiyini bildirən Anar Əliyev elektron xidmətlər sahəsində işlərin 90 faiz yerinə yetirildiyini deyib.

Nazir müavini 2021-ci ildən başlayaraq fəaliyyətə başlayan Baş Kollektiv Sazişin işini məşğulluq sahəsində təqdirəlayiq hesab edib.