Martın 29-da Azərbaycan Milli Elmlər Akademiyasının Nizami Gəncəvi adına Milli Azərbaycan Ədəbiyyatı Muzeyində 27 Mart - Elm Gününə həsr olunan elmi sessiya keçirilib.

AZƏRTAC xəbər verir ki, tədbiri giriş sözü ilə açan muzeyin baş direktoru akademik Rafael Hüseynov akademiyanın yaranması tarixindən, Azərbaycanda Elm Günün təsis olunmasından danışıb. Akademik qeyd edib ki, Prezident İlham Əliyevin 2018-ci il 9 aprel tarixli Sərəncamı ilə martın 27-nin Azərbaycanda Elm Günü elan olunması respublikamızın elmi ictimaiyyətinə, onun nailiyyətlərinə yüksək diqqət və etimadın göstəricisidir. Ölkəmizdə elm sahələrinin tərəqqi və təbliği, dünya elminə ardıcıl inteqrasiyası müstəqil Azərbaycan Respublikasının uğurla həyata keçirdiyi dövlət siyasətinə daxildir.

Daha sonra Rafael Hüseynov “Azərbaycan düşüncə mühitində elm və poeziyanın vəhdəti” mövzusunda məruzə ilə çıxış edərək Azərbaycan ədəbiyyatının tarixi təşəkkül dövründə onu yaradan fikir, irfan sahiblərinin şeir sənəti ilə yanaşı, elmin müxtəlif sahələrinin də mahir bilicisi olduğunu, Azərbaycan bədii fikrinin həm də nücum, riyaziyyat, tibb, fəlsəfə kimi dünya elmlərinin açarı olduğunu qeyd edib. Akademik diqqətə çatdırıb ki, Azərbaycan ərazisinə və əhalisinin sayına görə dünyada ön sıralarda yer almır, lakin elminin inkişafına, dünyaya bəxş etdiyi elm adamlarının sayına görə istənilən ölkə ilə müqayisə oluna bilər. Azərbaycan tarixin bütün dövrlərində alimləri ilə tanınıb, özünün elmi, mədəniyyəti ilə ölkələr arasında ön sıralarda dayanıb. “Azərbaycan fəxr edə bilər ki, XIII əsrdə onun iki akademiyası, universiteti vardı. Marağada Nəsrəddin Tusi rəsədxana yaratmışdı. Orada Marağa akademiyası olub. Həmin akademiyada işləyənlər yalnız azərbaycanlılar deyildi. Mavərənnəhrdən Afrikaya, İspaniyaya, Çinə qədər dünyanın böyük alimləri buraya toplanmışdılar. XIII əsrdə Təbriz şəhəri yaxınlığında Rəşidiyyə şəhərçiyi salınmışdı. Bugünkü anlamda yanaşsaq, bu, universitet şəhərciyi idi, dünyanın tanınmış alimləri, elm, ədəbiyyat, mədəniyyət adamları burada yığışmışdılar. Dünyanın müxtəlif yerlərindən məşhur təbabət alimləri də universitet şəhərciyinə dəvət olunmuşdu. Onların qarşısında şərt qoyulmuşdu ki, hər biri tibb sahəsində azı 10 mütəxəssis yetişdirməlidir. Bütün bunlar Azərbaycanda elmi mühitin zənginləşməsinə öz töhfəsini vermişdi. Bu gün də Azərbaycanda elmin, təhsilin inkişafına xüsusi önəm verilir. Dünyanın müasir inkişafı elmi bilikləri daha əlçatan edib. Arzu edirəm ki, insanlarımız yaradılan imkanlardan istifadə edərək öz biliklərini artırsınlar, inkişaf edən Azərbaycanımıza töhfə verə bilsinlər. Dahi şairimiz Nizami Gəncəvi deyirdi: “Qüvvət elmdədir! Başqa cür heç kəs, Heç kəsə üstünlük eyləyə bilməz...”. Biz də çalışmalıyıq ki, elmimizlə, biliyimizlə üstünlüyümüzü həmişə göstərə bilək”, - deyə akademik Rafael Hüseynov vurğulayıb.

Tədbirdə, həmçinin muzeyin Elmi inkişaf və tədris layihələri şöbəsinin müdiri professor Kamil Allahyarovun “Elm və poeziya; oxşar və fərqli cəhətlər” mövzusunda məruzəsi dinlənilib.