Avqustun 4-də ADA Universitetində “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı”nın 2026/2027-ci tədris ili üzrə qalibləri ilə görüş keçirilib.

AZƏRTAC xəbər verir ki, Elm və Təhsil Nazirliyinin Dövlət Proqramı İdarəetmə Qrupunun təşkilatçılığı ilə keçirilən tədbirin məqsədi proqram qaliblərini xaricdə təhsil mərhələsinə hazırlamaq, onlara proqram çərçivəsində yaradılan imkanlar və öhdəliklər barədə məlumat vermək, həmçinin iştirakçıları maraqlandıran sualları cavablandırmaq olub.

Görüşdə proqram iştirakçılarına xaricdə təhsilə hazırlıq prosesi, qarşıdakı mərhələlər, akademik və peşəkar inkişaf imkanları, eləcə də ictimai təmsilçilik məsələləri ilə bağlı ətraflı məlumat və tövsiyələr təqdim edilib.

Tədbirdə çıxış edən elm və təhsil nazirinin müavini Həsən Həsənli və Dövlət Neft Fondunun icraçı direktorunun müavini Rövşən Cavadov Dövlət Proqramının ölkədə insan kapitalının inkişafına verdiyi töhfədən, gənclərə göstərilən etimaddan və proqram iştirakçılarının gələcək fəaliyyətinə dair gözləntilərdən danışıblar.

Dövlət Proqramı İdarəetmə Qrupunun rəhbəri Qədir Xəlilov isə 2026/2027-ci tədris ili üzrə qəbulun statistik göstəricilərini təqdim edib. O bildirib ki, təqaüdçülərin seçimi namizədlərin bilik və bacarıqları, motivasiyası, məqsədyönlülüyü və ümumi hazırlıq səviyyəsinin kompleks qiymətləndirildiyi rəqabətli seçim prosesi əsasında həyata keçirilir.

Elm və Təhsil Nazirliyinin İctimaiyyətlə əlaqələr və kommunikasiya şöbəsinin müdir müavini Ayla Həsənova-Məmmədova çıxışında gəncləri xaricdə təhsil aldıqları müddətdə Azərbaycan həqiqətlərinin beynəlxalq ictimaiyyətə çatdırılmasında fəal olmağa çağırıb, onların ictimai müzakirələrdə məsuliyyətli mövqe nümayiş etdirməsinin əhəmiyyətini vurğulayıb.

Diasporla İş üzrə Dövlət Komitəsinin Avropa ölkələri şöbəsinin müdir müavini Orxan Kərimov isə xaricdə yaşayan azərbaycanlı icmaları ilə əlaqələrin qurulmasının, ölkənin tarixi, mədəniyyəti və müasir inkişafı barədə dolğun məlumatların çatdırılmasının, həmçinin gənclərin diaspor fəaliyyətində və ictimai təşəbbüslərdə fəal iştirakının vacibliyini diqqətə çatdırıb.

Görüşdə Dövlət Proqramı məzunları da çıxış edərək təcrübələrini yeni proqram qalibləri ilə bölüşüblər. London İmperial Kollecində (Böyük Britaniya) ictimai səhiyyə ixtisası üzrə təhsil almış Aydan Poladova və Miçiqan Universitetində (ABŞ, Enn Arbor) dövlət idarəetməsi ixtisası üzrə təhsil almış Raul Məmmədov xaricdə təhsil müddətində qazandıqları akademik və peşəkar təcrübələrdən bəhs ediblər.

Tədbirdə Dövlət Proqramı İdarəetmə Qrupunun proqram iştirakçıları ilə iş üzrə mütəxəssisi Nərmin Bünyatova xaricdə təhsilə hazırlıq və növbəti mərhələlərə dair təqdimatla çıxış edib.