Azərbaycanda Dövlət Qulluğunu İdarəetmə Şurasının fəaliyyəti gücləndiriləcək.

AZƏRTAC xəbər verir ki, bununla bağlı qərar layihəsi Milli Məclisin Hüquq siyasəti və dövlət quruculuğu komitəsinin dekabrın 21-də keçirilən iclasının gündəliyində yer alıb.

İclasda Azərbaycan Respublikasının 2002-ci il 29 mart tarixli 283-IIQ nömrəli Qanunu ilə təsdiq edilmiş “Azərbaycan Respublikasının Dövlət Qulluğunu İdarəetmə Şurası haqqında Əsasnamə”də dəyişiklik edilməsi ilə bağlı qanun layihəsi birinci oxunuşda təqdim edilib. Qanun layihəsi Dövlət Qulluğunu İdarəetmə Şurasının fəaliyyətinin gücləndirilməsi məqsədilə hazırlanıb.

Bildirilib ki, Azərbaycan Prezidentinin 2018-ci 23 noyabr tarixli 739 nömrəli Sərəncamı ilə təsdiq edilmiş “Azərbaycan Respublikasında dövlət qulluğunun inkişafına dair 2019−2025-ci illər üçün Strategiya”da dövlət qulluğunun inkişafı istiqamətləri sırasında dövlət qulluğunun inkişafında, bu sahədə kadr siyasətinin formalaşdırılmasında, dövlət qulluğunun vəziyyətinin və səmərəliliyinin təhlilində, normativ metodiki təminatının həyata keçirilməsində xüsusi rolu olan Dövlət Qulluğunu İdarəetmə Şurasının fəaliyyətinin gücləndirilməli olduğu qeyd olunub. Həmin strategiyanın icrası üzrə Fəaliyyət Planının “Dövlət qulluğunda institusional islahatların həyata keçirilməsi” bölməsində Dövlət Qulluğunu İdarəetmə Şurasının dövlət qulluğu sahəsinin inkişafında daha aktiv rol oynamasının təmin edilməsi hədəfi müəyyən olunub.

Qanun layihəsi müzakirələrdən sonra plenar iclasa tövsiyə olunub