Yeni il bayramı ilə əlaqədar Bakı şəhərinin parkları, meydan və küçələri əl-əlvan bəzədilib. AZƏRTAC xəbər verir ki, paytaxtda əlamətdar bayram münasibətilə xüsusi hazırlıq və tərtibat işləri həyata keçirilib.

Buna uyğun olaraq, Bakının istirahət parkları bayramsayağı bəzədilib, Yeni il atributları, şam ağacları, işıqlı çilçıraqlar və digər bəzəklər quraşdırılıb.

Yeni il şənlikləri ilə əlaqədar şəhərdə insanların daha çox toplaşdığı və şənləndiyi məkanlardan olan Dənizkənarı bulvarda bu il fərqli və geniş formada xüsusi proqram əsasında bayram hazırlıqları aparılıb.

Bulvar ərazisində Yeni ilin rəmzlərindən ibarət rəngarəng kompozisiyalar qurulub.

Bundan əlavə, uşaqların mənalı istirahətini təmin etmək məqsədilə Dənizkənarı Milli Parkın “Köhnə bulvar” ərazisində əyləncəli-musiqili proqramlar da təşkil olunub.

Dövlət Kukla Teatrının arxasındakı ərazidə çilçıraqlı xizəkli maral, oyuncaqlar həmin əraziyə yeni gözəllik verir.

Bununla yanaşı, səhnədə diskoteka, tamaşalar, işıq şousu da nümayiş olunur. Həmçinin uşaqların asudə vaxtının səmərəli keçirilməsi üçün nağıl və cizgi film qəhrəmanlarının obrazlarında animatorlar uşaqlara bayram sevinci bəxş edir.

Dənizkənarı Bulvar İdarəsinin təşkil etdiyi Yeni il şənlikləri paytaxt sakinlərində və qonaqlarda xoş ovqat oyadır.