Regional İnkişaf İctimai Birliyinin (RİİB) təşkilatçılığı, Ailə, Qadın və Uşaq Problemləri üzrə Dövlət Komitəsinin (AQUPDK) tərəfdaşlığı ilə reallaşdırılan “Hüquqlarınla parla!” layihəsi çərçivəsində seçilən 30 uşağın komitə sədri Bahar Muradova ilə görüşü keçirilib.

AZƏRTAC xəbər verir ki, "Uşaq Hüquqları Aylığı" çərçivəsində təşkil olunan tədbirdə çıxış edən RİİB-in beynəlxalq təşkilatlarla əməkdaşlıq şöbəsinin müdiri Gülbağda Leysanova Hacıyeva bildirib ki, sözügedən layihə Azərbaycanda 2025-ci ilin “Konstitusiya və Suverenlik İli” elan olunması və “Uşaqlara dair 2020–2030-cu illər üçün Strategiya”nın həyata keçirilməsi çərçivəsində hazırlanıb. Layihənin məqsədi uşaqların hüquqlarının müdafiəsi sahəsində davamlı və ölçüləbilən addımlar atmaqdır.

O qeyd edib ki, layihə çərçivəsində iyul–noyabr ayları ərzində respublikanın müxtəlif bölgələrində yerləşən bir çox təhsil müəssisələrində maarifləndirici tədbirlərin, hüquqi və sosial mövzulara dair təlimlərin və interaktiv sessiyaların təşkili nəzərdə tutulub: "Artıq bir çox regionlarda uğurla icra olunmuş bu tədbirlər nəticəsində 2 mindən çox uşaq maarifləndirilib. Layihənin mühüm yeniliklərindən biri də “Hüquqlarınla Parla” mobil tətbiqidir. Tətbiq vasitəsilə 11–17 yaşlı uşaqlar hüquqlarla bağlı materialları oxuya, imtahan verərək sertifikat ala, təhlükəsizlik, sağlamlıq və hüquq mövzularında interaktiv testlərdən keçə, dövlət qurumlarının qaynar xətt nömrələrinə sürətli giriş əldə edə biləcəklər".

AQUPDK-nın sədri B. Muradova vurğulayıb ki, dünyada çoxsaylı münaqişələr, aktiv müharibələr dövründə insanlar ev-eşiklərini tərk etmək məcburiyyətində qalır, onların həyatı dəyişir, bu proseslərdə ən çox əziyyət çəkənlər isə qadın və uşaqlar olur: "Azərbaycan neçə illər münaqişədən əziyyət çəkib və bu situasiyadan doğru yolu seçə bilib, öz ərazisini işğaldan azad edib. Uşaqlardan danışanda birinci hüquqlardan bəhs etməliyik. Hamı üçün universal olan hüquqlar var ki, biz onların hər birini tanımışıq. Azərbaycan həm uşaq hüquqlarının qorunması, həm də qadınların ayrı-seçkiliyə məruz qalmasının qarşısının alınması ilə bağlı və ümumilikdə bütün insanların təhlükəsiz, azad yaşamaq hüquqlarını tanıyan konvensiyaların üzvüdür", - deyə o diqqətə çatdırıb.

Görüş zamanı komitə sədri uşaqların suallarını cavablandırıb.v