Noyabrın 5-də Akademik Milli Dram Teatrında Daxili İşlər Nazirliyi (DİN) tərəfindən Zəfər Gününün ikinci ildönümünə həsr olunmuş təntənəli mərasim keçirilib.

AZƏRTAC xəbər verir ki, tədbirdə 44 günlük Vətən müharibəsində iştirak etmiş DİN-in hərbi qulluqçuları və polis əməkdaşları iştirak ediblər.

Əvvəlcə respublikamızın suverenliyi, ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla anılıb.

Dövlət Himni səsləndikdən sonra Azərbaycan Respublikasının daxili işlər naziri, general-polkovnik Vilayət Eyvazovun 8 noyabr – Zəfər Günü ilə əlaqədar tədbir iştirakçılarına ünvanladığı təbrikləri və xoş arzuları onların diqqətinə çatdırılıb.

Mərasimdə çıxış edən Daxili İşlər Nazirliyinin Daxili Qoşunlarının komandanının müavini, general-mayor İnqilab Muradov Müzəffər Ali Baş Komandan İlham Əliyevin vahid komandanlığı ilə dəmir yumruq kimi birləşən Silahlı qüvvələrimiz, o cümlədən Daxili İşlər Nazirliyinin hərbi qulluqçularının və polis əməkdaşlarının Vətən müharibəsində şərəfli döyüş yolu keçdiyini vurğulayıb. Şəxsi heyətin Murovdağdan Şuşaya qədər gedən döyüşlərdə iştirak etdiyini qeyd edən məruzəçi torpaqların azad olunması zamanı 66 nəfərin şəhidlik zirvəsinə ucaldığını, 346 nəfərin yaralandığını, 4 nəfərin “Vətən Müharibəsi Qəhrəmanı” adına layiq görüldüyünü, minlərlə əməkdaşın isə orden və medallarla təltif olunduğunu qeyd edib.

Sonra çıxış edən Daxili İşlər Nazirliyinin İdarə rəisi, polis polkovniki Elçin Məmmədli qeyd edib ki, dövlətimizin başçısının xüsusi diqqət və qayğısı ilə əhatə olunmuş hərbi qulluqçularımız və polis əməkdaşları bilik və bacarıqlarını, peşəkarlıqlarını artırmaqla onlara göstərilən bu etimadı doğrultmaq üçün səy və bacarıqlarını əsirgəmirlər.

Tədbirin davamında çıxış edənlər - Daxili İşlər Nazirliyinin “N” saylı hərbi hissəsinin Xüsusi Təyinatlı Dəstəsinin komandiri, “Zəfər” ordenli kapitan Anar Mahmudov, “Füzulinin azad olunmasına görə” medalı ilə təltif edilmiş Hacıqabul Rayon Polis Şöbəsinin bölük komandiri, polis mayoru Elçin Bəhmənov, “Şuşanın azad olunması” medalı ilə təltif edilmiş DİN-in Əlahiddə Çevik Polis Alayının polis nəfəri, kiçik serjant Kənan Sultanov və digərləri istər Birinci Qarabağ döyüşlərində, istərsə də 44 günlük Vətən müharibəsində nazirliyin hərbi qulluqçularının və polis əməkdaşlarının ön cəbhənin müxtəlif istiqamətlərində işğalçı düşmənə qarşı mətinliklə döyüşdüklərini bildiriblər. Çıxışçılar işğaldan azad olunan ərazilərdə Daxili İşlər Nazirliyinin hərbi qulluqçuları və polis əməkdaşlarının xidməti vəzifələrini bu gün böyük qürur hissi ilə davam etdirdiklərini məmnunluqla qeyd ediblər.

Sonda Xalq artıstı Azər Paşa Nemətovun müəllifi və quruluşçu rejissoru olduğu “Zəfər yolu” tamaşası nümayiş etdirilib.