SOCAR-ın “Downstream Management” şirkəti tərəfindən modernizasiya layihəsi çərçivəsində inşa olunan çirkab sularının təmizlənməsi qurğusunun inşaat işləri tamamlanmaq üzrədir. Hazırda qurğunun hissə-hissə işə salınması işləri həyata keçirilir.

AZƏRTAC xəbər verir ki, bu barədə jurnalistlərə müsahibəsində “Downstream Management" şirkətinin Baş direktorunun müavini, layihənin direktoru Emil Alxaslı məlumat verib.

Onun sözlərinə görə, qurğunun 2022-ci ilin ikinci yarısında istismara verilməsi nəzərdə tutulur. Həm neft emallı zavodundan çıxan çirkab suları, həm yağış sularının toplanması və qurğuda emal edilməsi planlaşdırılır.

E.Alxaslı qeyd edib ki, təmizlənmiş su Xəzər dənizi hövzəsinə göndəriləcək. Bundan başqa, layihə çərçivəsində əlavə 10 kilometrlik boru kəməri çəkilib. Beynəlxalq standartların tələblərinə görə, müvafiq araşdırmalar aparılıb, suyun təmizlənmə dərəcəsi müəyyənləşdirildikdən sonra istismara veriləcək. Köhnə sistemlər isə istismardan çıxarılacaq.

Şirkət rəsmisi, eyni zamanda, layihə çərçivəsində çirkab sularının yenidən istifadəsi qurğusu ilə bağlı işlərin görüldüyünü diqqətə çatdırıb. Ümumilikdə isə 2022-ci ilin sonuna qədər bu layihənin yekunlaşdırılması nəzərdə tutulur.