Bakıda "Cinayət prosesində uşaq hüquqlarının müdafiəsi” mövzusunda türkiyəli ekspertlərin iştirakı ilə keçirilən ikigünlük təlimin açılışı olub.

AZƏRTAC xəbər verir ki, Azərbaycan Respublikası Ailə, Qadın və Uşaq Problemləri üzrə Dövlət Komitəsi tərəfindən keçirilən təlimin ilk günündə Daxili İşlər Nazirliyinin 20 təhqiqatçı və müstəntiqi iştirak edir.

Təlimin açılış mərasimində Ailə, Qadın və Uşaq Problemləri üzrə Dövlət Komitəsi sədrinin müavini Səadət Qəhrəmanova bildirib ki, cinayət törədildikdə uşaqlara yanaşma, uşaqların hüquqların qorunması çox önəmli məsələdir: “Məişət zorakılığı faktını araşdırdıqda bu mühitdə olan uşaqlar diqqətdən kənar qalır. Amma artıq biz onlara diqqət edirik. Zorakılıq mühitində olan uşaqlar bu mənada çox əziyyət çəkir. Onlar belə mühitdə olaraq birbaşa psixoloji zorakılığa məruz qalırlar. Zorakılıq mühitində olan uşağın özünün cinayət törətməsi, cinayətə meyilli olması hallarına rast gəlinir. Buna görə də artıq zorakılıq mühitində olan uşaqlarla da məşğul oluruq".

Təlimdə cinayət təqibi üzrə yetkinlik yaşına çatmayanlar barəsində məhkəməyədək icraatın xüsusiyyətləri, cinayətlərin araşdırılması zamanı zərərçəkmiş və ya şahid olan uşaqların hüquqlarının müdafiə (dəstək) təminatı, cinayət təqibi orqanlarının uşaq hüquqlarının müdafiəsi üzrə qurumlarla əməkdaşlıq üsulları, “Uşaqların cinsi istismar və cinsi zorakılıqdan müdafiəsi haqqında” Avropa Şurasının Konvensiyası (Lansarote Konvensiyası) üzrə öhdəliklərin yerinə yetirilməsi ilə bağlı Türkiyə təcrübəsi və digər mövzular əhatə ediləcək.

Qeyd edək ki, təlim “Azərbaycan və Türkiyə Hökumətləri arasında imzalanmış ailə, qadın və uşaq məsələləri üzrə siyasət sahəsində Əməkdaşlıq Protokolu ilə bağlı Fəaliyyət Planı” çərçivəsində təşkil olunub.