Ürək-damar xəstəliklərinin dünyada ölümlə nəticələnən xəstəliklər arasında birinci yeri tutması bu sahəyə xüsusi diqqətin ayrılmasını tələb edir. Çünki bütün dünyada olduğu kimi, ölkəmizdə də qeyri-infeksion xəstəliklər arasında ürək-damar xəstəlikləri vaxtsız ölümlərin əsas səbəblərindən biridir. İcbari tibbi sığortanın xidmətlər zərfi tərtib edilərkən əsas nəzərə alınan prinsiplərdən biri də məhz əlillik və ölüm riski yüksək olan xəstəliklər olub.

Qeyd etmək istərdim ki, ürək-damar xəstəliklərinin müayinə və müalicəsi, xüsusən dəyəri yüksək olan açıq ürək əməliyyatları, təxminən 210-dan artıq tibbi xidmət icbari tibbi sığorta təminatına alınıb.

Bura aorto-koronar şuntlama əməliyyatı, ürək qapaqlarının dəyişdirilməsi və təmiri, anadangəlmə ürək qüsurlarının cərrahi müalicəsi və bir sıra digər əməliyyatlar daxildir. Vətəndaşlarımızın belə bahalı əməliyyatlardan ödənişsiz faydalana bilməsi bizi çox sevindirir. Bu, onu göstərir ki, icbari tibbi sığortanın tətbiqi nəticəsində bir çox əməliyyatlar artıq hər kəs üçün əlçatandır.

AZƏRTAC xəbər verir ki, bunu İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev Azərbaycan Kardiologiya Cəmiyyətinin XI Milli Konqresində deyib.

Zaur Əliyev bildirib ki, cari ildə müqaviləli tibb müəssisələrində icbari tibbi sığorta çərçivəsində 16 min 632 ürək-damar əməliyyatı aparılıb. Onlardan 184-ü uşaqlar üzərində icra olunub. Bundan başqa akademik M.A.Topçubaşov adına Elmi-Cərrahiyyə Mərkəzində 18 yaşdan yuxarı şəxslər üzərində 394, uşaqlar üzərində isə 177 ürək əməliyyatı icra olunub.

“Bir zamanlar ölkəmizdə aparılması mümkünsüz olan çox çətin ürək əməliyyatları artıq bir neçə tibb müəssisəsində yerli cərrahlarımız tərəfindən uğurla icra olunur. Vətəndaşlarımızın məhz yerli mütəxəssislər tərəfindən əməliyyat olunaraq sağlamlığına qovuşması təqdirəlayiqdir. Bu şərəfli peşə sahibləri arasında xaricdə rezidentura təhsili alıb Azərbaycana qayıdan həkimlər də az deyil. Bu gün həmin həkimlərin bir çoxunun burada olması, iştirak etdiyimiz tədbirin əhəmiyyətindən xəbər verir”, - deyə Z.Əliyev qeyd edib.